ທ່ານ ສຈ. ປອ ກິແກ້ວ ໄຂຄໍາພິທູນ ເລຂາທິການສູນກາງ...

ສ້າງຂື້ນເມື່ອ ວັນສຸກ, 23 ສິງຫາ 2019 01:45
ຂຽນໂດຍ ກິ່ນນາລົມ

ທ່ານ ສຈ. ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ ຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາ.
          ໃນວັນທີ 19 ສິງຫາ 2019 ນີ້ ຢູ່ທີ່ສະໂມສອນແຂວງຫຼວງນໍ້າທາ ທ່ານ ສຈ. ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວໜ້າຄະນະໂຄສະນາ

ອົບຮົມສູນກາງພັກພ້ອມດ້ວຍຄະນະໄດ້ພົບປະໂອ້ລົມພະນັກງານຫຼັກແຫຼ່ງພາຍໃນແຂວງໂດຍມີທ່ານ ເພັດຖາວອນ ພິລະວັນ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນໍ້າທາ, ມີຮອງເລຂາພັກແຂວງ, ຫົວໜ້າພະແນກ-ຮອງພະແນກການອ້ອມຂ້າງແຂວງ, ເຈົ້າເມືອງ 5 ເມືອງ,ພະນັກງານຫຼັກແຫຼ່ງເຂົ້າຮ່ວມ.

          ໃນໂອກາດພົບປະໂອ້ລົມດັ່ງກ່າວທ່ານ ເພັດຖາວອນ ພິລະວັນ ເຈົ້າແຂວງໆຫຼວງນ້ຳທາໄດ້ລາຍງານສະພາບລວມໃນການປົກປັກຮັກສາ ແລະ ສ້າງສາພັດທະນາແຂວງຫຼວງນໍ້າທາໄລຍະຜ່ານມາເຊິ່ງແຂວງຫຼວງນໍ້າທາເປັນແຂວງທີ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ, ສະພາບແນວຄິດຂອງພະນັກງານ, ທະຫານ, ຕໍາຫຼວດ ແລະ ພໍ່ແມ່ປະຊາຊົນບັນດາເຜົ່າມີຄວາມອຸ່ນອຽນທຸ່ນທ່ຽງ, ເສດຖະກິດຂະຫຍາຍຕົວຢ່າງຕໍ່ເນື່ອງ, ໃນລະດັບ 8,99%ຕໍ່ປີ, ສະເລ່ຍລາຍຮັບຕໍ່ຫົວຄົນໄດ້ 1.796 ໂດລາ ທຽບໃສ່ປີ 2015 ເພີ່ມຂື້ນ 522 ໂດລາ, ການຜະລິດເປັນສິນຄ້າກໍ່ໄດ້ຂະຫຍາຍຕົວເພີ່ມຂື້ນເຊັ່ນ: ການປູກຢາງພາລາ, ອ້ອຍ, ມັນຕົ້ນ, ສາລີ, ໜາກອື, ໜາກນໍ້າມັນ, ພຶດຕະກຸນຖົ່ວ ແລະ ອື່ນໆ ນອກນັ້ນຍັງໄດ້ສຸມໃສ່ການລ້ຽງສັດປະເພດຕ່າງໆຄື: ງົວ, ຄວາຍ, ແບ້, ໝູ, ປາ ແລະ ສັດປິກ ເພື່ອສະໜອງໃຫ້ແກ່ຕະຫຼາດພາຍໃນ ແລະ ຕ່າງປະເທດ, ພ້ອມທັງເອົາໃຈໃສ່ປົກປັກຮັກສາສິ່ງແວດລ້ອມຊັບພະຍາກອນທຳມະຊາດປ່າໄມ້-ຊີວະນາໆພັນໃຫ້ຍືນຍົງ, ການຄຸ້ມຄອງລາຍຮັບ- ລາຍຈ່າຍກໍ່ໄປຕາມລະບຽບການ ແລະ ກົດໝາຍ, ການຂຸດຄົ້ນລາຍຮັບເຂົ້າງົບປະມານໃນໄລຍະຜ່ານມາແມ່ນລຶ່ນຄາດໝາຍ, ດ້ານພື້ນຖານໂຄ່ງລ່າງກໍ່ໄດ້ຮັບການພັດທະນາ,ຖະໜົນຫົນທາງກໍ່ໄດ້ຮັບການປັບປຸງ ແລະ ຍົກລະດັບເຮັດໃຫ້ການສັນຈອນໄປມາໄດ້ປົກປະຕິ, ປັດຈຸບັນບ້ານທີ່ມີເສັ້ນທາງລົດເຂົ້າເຖິງກວມເອົາ 99,4% ຂອງຈໍານວນບ້ານໃນທົ່ວແຂວງ, ປະຊາຊົນໄດ້ຊົມໃຊ້ໄຟຟ້າກວມ 89,18% ຂອງຈໍານວນຄົວເຮືອນ. ໂຄງການກໍ່ສ້າງເສັ້ນທາງລົດໄຟລາວ-ຈີນຊ່ວງຜ່ານແຂວງຫຼວງນໍ້າທາຄວາມຍາວ16,9 ກິໂລແມັດ, ໃນນີ້ມີອຸໂມງ 3 ແຫ່ງ, ເຈາະອຸໂມງສໍາເລັດແລ້ວ 89,5% ກໍໄດ້ຮັບການຕິດຕາມ ແລະ ອຳນວຍຄວາມສະດວກໃຫ້ແກ່ການກໍ່ສ້າງ ພ້ອມນັ້ນກໍໄດ້ສຸມໃສ່ພັດທະນາຊົນນະບົດ ແລະ ແກ້ໄຂຄວາມທຸກຍາກດ້ວຍຮູບແບບສ້າງບ້ານ ແລະ ກຸ່ມບ້ານພັດທະນາຕາມ 4 ເນື້ອໃນ 4 ຄາດໜາຍຕິດພັນກັບວຽກງານ 3 ສ້າງ, ຫັນພະນັກງານລົງກໍ່ສ້າງຮາກຖານການເມືອງ, ຈັດສັນການຜະລິດ ແລະ ອາຊີບຄົງທີ່ໃຫ້ແກ່ປະຊາຊົນ. ປັດຈຸບັນທົ່ວແຂວງມີບ້ານພັດທະນາ 214 ບ້ານ, ບ້ານພົ້ນທຸກ 283 ບ້ານ ແລະ ບ້ານທຸກຍາກ 79 ບ້ານ, ກວມ 21,47%, ຄອບຄົວທຸກຍາກ 2.716 ຄອບຄົວ ກວມ 7,78% ຂອງຈໍານວນຄອບຄົວໃນທົ່ວແຂວງ ໄປຄຽງຄູ່ກັບການພັດທະນາເສດຖະກິດ ການພັດທະນາທາງດ້ານວັດທະນາທໍາ-ສັງຄົມກໍໄດ້ເອົາໃຈໃສ່ປັບປຸງຄຸນນະພາບການສຶກສາ, ຍົກລະດັບຄວາມສາມາດໃນການການປີ່ນປົວທີ່ມີຄຸນນະພາບ ແລະ ການບໍລິການດ້ານສາທາລະນະສຸກ, ກໍ່ສ້າງ ແລະ ພັດທະນາສີມືແຮງງານ, ສ້າງວຽກເຮັດງານທໍາໃຫ້ແກ່ໄວໜຸ່ມ, ປະຕິບັດບັດນະໂຍບາຍຕໍ່ພະນັກງານປະຕິວັດ, ອາວຸໂສ-ບໍານານຜູ້ທີ່ມີຄຸນງາມຄວາມດີຕໍ່ປະເທດຊາດບ້ານເມືອງ, ຊ່ວຍເຫຼືອສັງຄົມສົງເຄາະໃຫ້ແກ່ຜູ້ເຄາະຮ້າຍ, ທຸກຍາກອານະຖາ, ເດັກກໍ່າພ້າ, ກໍ່າພອຍ ໄດ້ດີກວ່າເກົ່າ. ທົ່ວແຂວງມີ 81 ຄະນະພັກຮາກຖານ, ມີ 605 ໜ່ວຍພັກ, ມີສະມາຊິກພັກ 11.097 ສະຫາຍ, ຍິງ 2.918 ສະຫາຍ, ມີໜ່ວຍພັກປອດໃສ່ເຂັ້ມແຂງໜັກແໜ້ນ 426 ໜ່ວຍ, ປັດຈຸບັນແມ່ນສຸມໃສ່ກະກຽມການດໍາເນີນກອງປະຊຸມໃຫ່ຍ 3 ຂັ້ນຂອງພັກ, ໂດຍປະຕິບັດຕາມຄໍາສັ່ງ, ຄໍາແນະນໍາຂອງຄະນະເລຂາທິການສູນກາງພັກ, ຄະນະຈັດຕັ້ງສູນກາງພັກ, ການຊີ້ນໍາໆພາຂົງເຂດແນວລາວສ້າງຊາດ, ອົງການຈັດຕັ້ງມະຫາຊົນ ແລະ ສະຫະພັນນັກຮົມເກົ່າໄດ້ຖືສໍາຄັນ ແລະ ເອົາໃຈໃສ່ຊີ້ນໍາໆພາຢ່າງໃກ້ສິດ-ຕິດແທດໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນເປັນຢ່າງດີ.
          ໂອກາດດັ່ງກ່າວທ່ານ ສຈ. ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ໄດ້ໃຫ້ກຽດໂອ້ລົມ ແລະ ໄດ້ເນັ້ນໜັກຫຼາຍບັນຫາໃຫ້ຄະນະພັກແຂວງຈົ່ງພ້ອມກັນເອົາໃຈໃສຊີ້ນໍາໆພາ ແລະ ສ້າງສາພັດທະນາແຂວງຫຼວງນໍ້າທາຕາມທິດຊິ້ນຳ 4 ເນື້ອໃນ 4 ຄາດໝາຍໃຫ້ປະກົດຜົນເປັນຈິງເອົາໃຈໃສ່ສຶກສາອົບຮົມດ້ານການເມືອງແນວຄິດໃຫ້ແກ່ພະນັກງານ,ລັດຖະກອນ, ທະຫານ-ຕຳຫຼວດ ແລະ ປະຊາຊົນບັນດາເຜົ່າຈັດຕັ້ງເຊື່ອມຊື່ມບັນດາເນື້ອໃນເອກະສານລະບຽບການ,ນິຕິກໍາ, ສູ້ຊົນເກັບລາຍຮັບເຂົ້າງົບປະມານ ແລະ ການປູກ-ການລ້ຽງໃຫ້ກາຍເປັນສີນຄ້າ, ເອົາໃຈໃສ່ໂຄສະນາຕ້ານການຄ້າມະນຸດ, ຢາເສບຕິດ, ສາສະໜາທີ່ບໍ່ສອດຄ່ອງກັບລະບຽບກົດໜາຍ ແລະ ວຽກງານການຄຸ້ມຄອງຊາຍແດນໃຫ້ມີຄວາມສະຫງົບໂດຍພຶ້ນຖານ.
ມາໃນວັນທີ 20 ສິງຫາ 2019 ນີ້ທ່ານ ສຈ. ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກໄດ້ໃຫ້ກຽດໂອ້ລົມ ພະນັກງານໂຄສະນາອົບຮົມແຂວງຫຼວງນ້ຳທາ,ເຂົ້າຮ່ວມຮັບຟັງມີໂຄສະນາອົບຮົມ 5 ເມືອງ ແລະ ມີຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງຫຼວງນ້ຳທາ ແລະ ວິຊາການເຂົ້າຮ່ວມ.
          ທ່ານ ບຸນມາ ພັນດາວົງ ຫົວໜ້າຄະນະໂຄສະນາອົບຮົມແຂວງຫຼວງນ້ຳທາກໍ່ໄດ້ລາຍງານການຈັດຕັ້ງປະຕິບັດວຽກງານໄລຍະຜ່ານມາຂອງຄະນະໂຄສະນາອົບຮົມແຂວງ-ເມືອງພະນັກງານໂຄສະນາພວກເຮົາຍັງມີຄຸນທາດການເມືອງໜັກແໜ້ນ, ມີແນວຄິດອຸ່ນອ່ຽງທຸນທ່ຽງ, ເຊື່ອໝັນຕໍ່ການນຳພາຂອງພັກ-ລັດ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງຂອງກຸ່ມຄົນບໍ່ຫວັງດີ,ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ພັກ-ລັດມອບໝາຍໃຫ້, ເປັນເສນາທິການໃຫ້ແກ່ຄະນະປະຈຳພັກແຂວງ,ຄະນະປະຈຳພັກເມືອງ ແລະ ຄະນະໂຄສະນາອົບຮົມສູນກາງພັກໃນການຄົ້ນຄວ້າເຊື່ອມຊືມກຳແໜ້ນແນວທາງນະໂຍບາຍຂອງພັກລະບຽບກົດໝາຍລັດວາງອອກ, ຄະນະໂຄສະນາອົບຮົມແຂວງປະກອບມີ 4 ຂະແໜງການ ແລະ 5 ຄະນະໂຄສະອົບຮົມເມືອງ, ມີພະນັກງານລັດຖະກອນ 62 ສະຫາຍ ຍິງ 18 ສະຫາຍ,ໄດ້ຊ່ວຍຄະນະປະຈຳພັກແຂວງ,ຄະນະປະຈຳພັກເມືອງສົມທົບກັບພາກສ່ວນທີ່ກ່ຽວຂ້ອງຈັດຕັ້ງພິທີສະເຫຼີມສະຫຼອງ,ປາຖະກະຖາ,ເລົ່າມູນເຊື້ອເນື່ອງໃນໂອກາດວັນສຳຄັນຂອງຊາດ,ຂອງພັກ,ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງສາກົນ.ໂອກາດນີ້ທ່ານ ສຈ.ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກຍັງໄດ້ໃຫ້ກຽດໂອ້ລົມກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານໃນໄລຍະຜ່ານມາທີ່ທາງຄະນະໂຄສະນາອົບຮົມແຂວງໄດ້ສຸມໃສ່ປະຕິບັດໜ້າທີ່ວຽກງານ ແລະໄດ້ມີສ່ວນຮ່ວມເຂົ້າໃນການກະກຽມກອງປະຊຸມໃຫຍ່ສາມຂັ້ນຂອງພັກປະກອບສ່ວນເຂົ້າໃນການ ຕີຕ້ານປະກົດການຫຍໍ້ທໍ້ໃນສັງຄົມ, ມີຄວາມອຸ່ນອ່ຽງທຸນທ່ຽງທາງດ້ານການເມືອງ, ມີແບບແຜນເຮັດວຽກແບບປະຊາທິປະໄຕປະກອບສ່ວນເຂົ້າໃນການພັດທະນາປະເທດຊາດ,ປັບປຸງທາງດ້ານແນວຄິດ ແລະ ປຸງປັບອົງການຈັດຕັ້ງໃຫ້ແທດເໝາະກັບໜ້າທີ່ວຽກງານໃນໄລຍະໃໝ່.