ຫົວໜ້າຄະນະໂຄສະນາອົບຮົມສູນກາງພັກ ຕ້ອນຮັບ...

ສ້າງຂື້ນເມື່ອ ວັນສຸກ, 30 ສິງຫາ 2019 03:34
ຂຽນໂດຍ ຄອນສະຫວັນ

ຫົວໜ້າຄະນະໂຄສະນາອົບຮົມສູນກາງພັກ ຕ້ອນຮັບທ່ານທູດສະຫະພັນຣັດເຊຍເຂົ້າຢ້ຽມຄຳນັບອຳລາໜ້າທີ່ການທູດຢູ່ ສປປລາວ.

       ໃນຕອນເຊົ້າວັນທີ 28 ສິງຫາ 2019, ທ່ານ ສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກຫົວໜ້າຄະນະ ໂຄສະນາອົບຮົມສູນກາງພັກ ໄດ້ຕ້ອນຮັບ

ການເຂົ້າຢ້ຽມອຳລາຂອງທ່ານ ມິໄຄອິນ ບາຣາໂນບ(Mikhail BARANOV) ເອກອັກຄະລັດຖະທູດຜູ້ມີອໍານາດເຕັມແຫ່ງສະຫະພັນຣັດເຊຍ ປະຈໍາ ສ​ປ​ປ ລາວ ທີ່ຫ້ອງຮັບແຂກຂອງຄະນະໂຄສະນາອົບຮົມສູນກາງພັກ, ພາຍຫຼັງສຳ​ເລັດການປະຕິບັດໜ້າທີ່ການທູດ ຢູ່ ສປປ ລາວ.

       ໃນໂອກາດດັ່ງກ່າວ ທ່ານ ສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມ ສູນກາງພັກໄດ້ກ່າວສະແດງຄວາມຊົມເຊີຍຕໍ່ຜົນງານການເຄື່ອນໄຫວຢ່າງຫ້າວຫັນຂອງທ່ານເອກອັກຄະລັດຖະທູດ ໃນຕະຫຼອດໄລຍະທີ່ທ່ານເຄື່ອນໄຫວປະຕິບັດການທູດຢູ່ ສປປ ລາວ ເຊິ່ງທ່ານໄດ້ປະກອບສ່ວນເປັນຂົວຕໍ່​ໃຫ້ການພົວພັນຮ່ວມມືລະຫວ່າງ ລາວ-ສະຫະພັນຣັດເຊຍນັບມື້ນັບຂະຫຍາຍຕົວໄປສູ່ລວງເລິກ ໂດຍ​ສະ​ເພາະ​ແມ່ນການຊ່ວຍເຫຼືອວຽກງານປ້ອງກັນຊາດປ້ອງກັນຄວາມສະຫງົບ, ການພັດທະນາຊັບພະຍາກອນມະນຸດ ແລະ ຂົງເຂດອຶ່ນໆໃຫ້ແກ່ ສປປ ລາວ. ຕາງໜ້າໃຫ້ການນຳພັກ-ລັດຖະບານ ແລະ ປະຊາຊົນລາວ ຂໍສະແດງຄວາມຂອບໃຈຕໍ່​ລັດ​ຖະ​ບານ ​ກໍ່​ຄື​ປະ​ຊາ​ຊົນ​ຣັດເຊຍທີ່​ໄດ້​ໃຫ້​ການ​ຊ່ວຍ​ເຫຼືອ ສປ​ປ ລາວ ໄລ​ຍະ​ຜ່ານ​ມາ ແລະ ເຊື່ອໝັ້ນວ່າທ່ານທູດຈະສືບ ຕໍ່ໃຫ້ການຮ່ວມມືສົ່ງເສີມສາຍພົວພັນການ​ທູດອັນດີງາມ ລະຫວ່າງສອງປະເທດ ສະຫະພາບຣັດເຊຍ-ລາວ ໃຫ້ຈະເລີນງອກງາມຍິ່ງໆຂຶ້ນ; ພ້ອມທັງອວຍພອນໃຫ້ທູດທ່ານ ມິໄຄອິນ ບາຣາໂນບ(Mikhail BARANOV) ປະສົບຜົນສຳເລັດໃນການໄປຮັບໜ້າທີ່ໃຫມ່ຢູ່ກະຊວງການຕ່າງປະເທດຂອງສະຫະພັນຣັດເຊຍ.

​          ໂອ​ກາດນີ້ ທ່ານເອກອັກຄະລັດຖະທູດຜູ້ມີອຳນາດເຕັມແຫ່ງສະຫະພັນຣັດເຊຍ ປະຈຳ ສ​ປ​ປ ລາວ ກໍ່​ໄດ້​ສະ​ແດງ​ຄວາມ​ຂອບ​ໃຈ​ເປັນຢ່າງສູງຕໍ່​ພັກ​-ລັດ​ຖະ​ບານ​ ແລະ ປະ​ຊາ​ຊົນ ລາວ ​ທີ່​ໃຫ້ການ​ຕ້ອນ​ຮັບ​ອັນ​ອົບ​ອຸ່ນ ແລະ ໃຫ້​ຄວາມ​ຮ່ວມ​ມື-ອຳ​ນວຍ​ຄວາມ​ສະ​ດວກ​ຕະ​ຫຼອດໄລ​ຍະ​ຂອງ​ການ​ປະ​ຕິ​ບັດ​ໜ້າ​ທີ່​ການທູດຢູ່ ສ​ປ​ປ ລາວ ແລະ ມີ​ຄວາມ​ພາກ​ພູມ​ໃຈຕໍ່ຜົນ​ສຳ​ເລັດ​ໃນ​ການ​ພົວ​ພັນຮ່ວມ​ມືຂອງສອງ​ຝ່າຍ.