ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ຈັດພິທີມອບໃບຢັ້ງຢືນໃຫ້ແກ່ນັກສຶກສາຝຶກງານ.

ສ້າງຂື້ນເມື່ອ ວັນພຸດ, 19 ມີຖຸນາ 2019 10:00

ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ຈັດພິທີມອບໃບຢັ້ງຢືນໃຫ້ແກ່ນັກສຶກສາຝຶກງານ.

      ໃນຕອນເຊົ້າຂອງວັນທີ 5 ມິຖຸນາ 2019 ຜ່ານມາ, ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ໄດ້ຈັດພິທີມອບໃບຢັ້ງຢືນໃຫ້ແກ່ນັກສຶກສາຝຶກງານ 3 ທ່ານ ທີ່ມາຈາກ ວິທະຍາໄລລາວວຽງ ຢູ່ທີ່ຫ້ອງປະຊຸມຊັ້ນ 5 ຂອງຄະ ນະໂຄສະນາອົບຮົມສູນກາງພັກ ໃຫ້ກຽດເປັນປະທານໂດຍ ທ່ານ ວັນຕຸລາ ຣັກນຸດ ວ່າການຫົວໜ້າກົມຂໍ້ມູນຂ່າວ ສານ, ມີ: ຮອງກົມ, ຫົວໜ້າພະແນກ, ຮອງຫົວໜ້າພະແນກ, ພະນັກງານວິຊາການຂອງກົມຂໍ້ມູນຂ່າວສານທັງໝົດເຂົ້າຮ່ວມ ພ້ອມດ້ວຍນັກສຶກສາຝຶກງານ.

      ໃນພິທີມອບໃບຢັ້ງຢືນດັ່ງກ່າວ ທ່ານ ນາງ ອິດໄຊທອງ ສົມມະນີ ຫົວໜ້າພະແນກເຄືອຂ່າຍເອເລັກໂຕນິກ ໄດ້ຂື້ນຜ່ານບົດລາຍງານການລົງຝຶກງານ ຂອງ ນັກສຶກສາຝຶກງານ 3 ທ່ານ ທີ່ມາຈາກວິທະຍາໄລລາວວຽງ ໃນສາຂາວິຊາ ເຕັກໂນໂລຢີທຸລະກິດຄອມພິວເຕີ ປີທີ 3, ໄລຍະຝຶກງານ 2 ເດືອນ 3 ອາທິດ ເຊິ່ງເລີ່ມແຕ່ວັນທີ 8/4/2019-31/5/2019 ໂດຍນໍາໃຊ້ທິດສະດີທີ່ຮຽນມາເຂົ້າສູ່ການປະຕິບັດຕົວຈິງເຂົ້າໃນວຽກງານວິຊາສະເພາະ ແລະ ເກັບກ່ຽວ, ຮຽນຮູ້ໃນວຽກງານຕົວຈິງຂອງແຕ່ລະພະແນກ ໃນກົມຂໍ້ມູນຂ່າວສານ ເຊັ່ນ: ຕິດຕາມຈໍານວນຄົນທີ່ເຂົ້າມານໍາໃຊ້ຫ້ອງອິນເຕີເນັດ, ກວດກາລະບົບຫ້ອງ Server, ຮຽນຮູ້ວິທີການຕິດຕັ້ງ Router ສັນຍານ Wi-Fi, ວິທີໃສ່ເລກ IP Address, ການເຂົ້າສາຍແລນ, ປະກອບຄອມພິວເຕີ, ຕິດຕັ້ງວິນໂດ ແລະ ໂປຣແກຣມຕ່າງໆ, ວິທີແຊປິນເຕີ, ສ້ອມແປງຄອມພິວເຕີທີ່ມີບັນຫາຕ່າງໆ, ຮຽນຮູ້ຫຼັກການຂອງການສ້າງ slideshow, ຫຼັກການພິມເອກະສານ, ພ້ອມນັ້ນຍັງໄດ້ຮຽນຮູ້ກ່ຽວກັບການຈັດການເວັບໄຊສ, ການຂຽນຂ່າວ, ຕັດຕໍ່ຮູບພາບ ດ້ວຍໂປຣແກຣມ photoshop ປ້ອນຂຶ້ນໜ້າເວັບໄຊ ແລະ ການອັບໂຫຼດວິດີໂອ ຂຶ້ນຢູທູບ (youtube), ສ້າງເວັບHortting ຟຣີ ກ່ຽວກັບ ເວີກເພສ ແລະ ວຽກງານຂອງຫ້ອງສະໝຸດສໍາເນົາເອກະສານ;  ຫຼັງຈາກນັ້ນ ນັກສຶກສາຝຶກງານ ກໍໄດ້ຂຶ້ນຜ່ານບົດລາຍງານຜົນສໍາເລັດ ໃນໄລຍະການຝຶກງານ ແລະ ຈຸດດີ, ຂໍ້ຄົງຄ້າງທີ່ຈະຕ້ອງແກ້ໄຂໃນຕໍ່ໜ້າ, ບົດຮຽນທີ່ຖອດຖອນໄດ້ຂອງ ການລົງຝຶກງານຕົວຈິງໃນໄລຍະເວລາ 2 ເດືອນ 3 ອາທິດທີ່ຜ່ານມາ.

    

     ໃນຕອນທ້າຍຂອງພິທີ ທ່ານ ວັນຕຸລາ ຣັກນຸດ ໄດ້ໃຫ້ກຽດມີຄໍາເຫັນໂອ້ລົມຕໍ່ນັກສຶກສາຝຶກງານ ທ່ານໄດ້ເນັ້ນໜັກໃຫ້ນັກສຶກສາ ຈົ່ງພ້ອມກັນນໍາເອົາບົດຮຽນ, ຄວາມຮູ້ ຄວາມສາມາດ ທີ່ໄດ້ມາຝຶກງານຢູ່ ກົມຂໍ້ມູນຂ່າວສານ ນໍາໄປໝູນໃຊ້ເຂົ້າໃນການສຶກສາ ແລະ ວຽກງານຕົວຈິງໃນຕໍ່ໜ້າ ຂອງຕົນໃຫ້ປະສົບຜົນສໍາເລັດ;  ພ້ອມທັງມອບໃບຢັ້ງຢືນການລົງຝຶກງານໃຫ້ແກ່ນັກສຶກສາທັງສາມທ່ານ.