ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ ຢ່າງສຸດໃຈ.                                                                                                                                                                           ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ.                                                                                                                                                                               ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ.                                                                                                                                                                       ຊົມເຊີຍວັນສ້າງຕັ້ງ ສປປ ລາວ ຄົບຮອບ 43 ປີ.  

ກອງປະຊຸມຄົບຄະນະບໍລິຫານງານສູນກາງພັກ...

  ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ IX

   ວັນທີ 17 ເຖິງວັນທີ 21 ພະຈິກ 2014 ທີ່ນະຄອນຫຼວງວຽງຈັນ, ຄະນະບໍລິຫານງານສູນກາງພັກ ໄດ້ດຳເນີນກອງປະຊຸມຄົບຄະນະຄັ້ງທີ 9 ສະໄໝທີ IX ພາຍໃຕ້ການເປັນປະທານຂອງສະຫາຍເລຂາທິ ການໃຫຍ່ ຈູມມາລີ ໄຊຍະສອນ. ກອງປະຊຸມຄົບຄະນະຄັ້ງນີ້ ໄດ້ລົງເລິກຄົ້ນຄວ້າ, ປຶກສາຫາລື, ໃຫ້ທັດສະນະ ແລະ ທິດຊີ້ນຳຕໍ່ບັນຫາສຳຄັນຈຳນວນໜຶ່ງດັ່ງນີ້:


1. ກ່ຽວກັບການດຳເນີນກອງປະຊຸມໃຫຍ່ອົງຄະນະພັກຂັ້ນເມືອງ. 
ກອງປະຊຸມຄົບຄະນະໄດ້ສັງເກດຕີລາຄາວ່າ: ການດຳເນີນກອງປະຊຸມໃຫຍ່ອົງຄະນະພັກຂັ້ນເມືອງໃນທົ່ວປະເທດ ຊຶ່ງມາເຖິງເດືອນພະຈິກ 2014 ໄດ້ສຳເລັດແລ້ວ 121 ເມືອງໃນຈຳນວນ 146 ເມືອງ, ສ່ວນຫຼາຍແມ່ນໄດ້ດຳເນີນຖືກທິດ ແລະ ຫຼັກການແຫ່ງການ ກໍ່ສ້າງພັກ, ຫຼາຍທ້ອງຖິ່ນ ໄດ້ມີການນຳພາຊີ້ນຳການດຳເນິນຊີວິດການເມືອງພາຍໃນ, ກະກຽມເນື້ອໃນ ແລະ ບຸກຄະລາກອນທີ່ແທດເຖິງຕົວຈິງ ຕິດພັນ ກັບການປຸກລະດົມຊຸກຍູ້ຂະບວນການຮອບດ້ານຢ່າງຕໍ່ເນື່ອງ ໂດຍຖືເອົາຂະບວນການຊຸກຍູ້ການຜະລິດເປັນສິນຄ້າ, ແກ້ໄຂຄວາມທຸກຍາກຂອງປະຊາຊົນ ເປັນບັນຫາໃຈກາງ, ສຸມໃສ່ສ້າງຄອບຄົວພັດທະນາ, ສ້າງບ້ານພັດທະນາ ຕາມ 4 ເນື້ອໃນ 4 ຄາດໝາຍ. ຍ້ອນແນວນັ້ນ ຈຶ່ງເຮັດໃຫ້ລະບົບການເມືອງຢູ່ຂັ້ນທ້ອງຖິ່ນຮາກຖານ ໄດ້ຮັບການປັບປຸງໃຫ້ໜັກແໜ້ນ ເຂັ້ມແຂງຂຶ້ນຕື່ມບາດກ້າວໜຶ່ງ,  ປະກອບ ສ່ວນຊຸກຍູ້ໃຫ້ແກ່ການສ້າງ ເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ມີບາດກ້າວໃໝ່ທີ່ຕັ້ງໜ້າ; ໄດ້ເກີດມີຫຼາຍໜໍ່ແໜງປັດໄຈໃໝ່ໃນການພັດທະນາຢູ່ໃນຫຼາຍທ້ອງຖິ່ນຮາກຖານ ໃນທົ່ວປະເທດ. ເຖິງຢ່າງນັ້ນກໍຕາມຍັງມີທ້ອງຖິ່ນຈຳ ນວນໜຶ່ງ ບໍ່ທັນໄດ້ດຳເນີນກອງປະຊຸມໃຫຍ່ອົງຄະນະພັກເມືອງເທື່ອ. ດັ່ງນັ້ນກອງປະຊຸມຄົບຄະນະຈຶ່ງໄດ້ໃຫ້ທິດຊີ້ນຳຄະນະພັກ ທີ່ກ່ຽວ ຂ້ອງຮີບຮ້ອນກະກຽມດ້ານຕ່າງໆໃຫ້ຄົບຖ້ວນ ແລະ ຖອດຖອນບົດຮຽນຈາກບັນດາອົງຄະນະພັກເມືອງທີ່ໄດ້ດຳເນີນກອງປະຊຸມໃຫຍ່ສຳ ເລັດຜົນແລ້ວນັ້ນ ເພື່ອເຮັດໃຫ້ກອງປະຊຸມໃຫຍ່ອົງຄະນະພັກເມືອງຂອງຕົນ ໄດ້ຮັບຜົນສຳເລັດດີຂຶ້ນກ່ວາເກົ່າ ແລະ ໃຫ້ສຳເລັດການດຳ ເນີນກອງປະຊຸມໃຫຍ່ອົງຄະນະພັກຂັ້ນເມືອງ ໃນທົ່ວປະເທດ, ຊ້າສຸດບໍ່ໃຫ້ກາຍເດືອນມັງກອນ 2015.
2. ກ່ຽວກັບການດຳເນີນກອງປະຊຸມໃຫຍ່ອົງຄະນະພັກແຂວງ, ນະຄອນ ແລະ ບັນດາອົງການອ້ອມຂ້າງສູນກາງ. 
ກອງປະຊຸມຄົບຄະນະໃຫ້ທິດຊີ້ນຳວ່າ: ການກະກຽມດຳເນີນກອງປະຊຸມໃຫຍ່ອົງຄະນະພັກແຂວງ, ນະຄອນ ແລະ ບັນດາອົງການອ້ອມຂ້າງສູນກາງ ແມ່ນມີຄວາມສຳຄັນຫຼາຍ ເພາະເປັນກອງປະຊຸມໃຫຍ່ ທີ່ກະກຽມໃຫ້ແກ່ການດຳເນີນກອງປະຊຸມໃຫຍ່ທົ່ວປະເທດຂອງພັກ. ດັ່ງນັ້ນ ກອງປະຊຸມຄົບຄະນະໄດ້ເນັ້ນໜັກວ່າ: ການດຳເນີນກອງປະຊຸມໃຫຍ່ອົງຄະນະພັກຂັ້ນແຂວງ, ນະຄອນ ແລະ ບັນດາອົງການອ້ອມຂ້າງສູນກາງ ນີ້ຕ້ອງໃຫ້ສຸມໃສ່ນຳພາການດຳເນີນຊີວິດການເມືອງ, ການກະກຽມບຸກຄະລາກອນ ແລະ ເນື້ອໃນໃຫ້ຖືກຕ້ອງຕາມມະຕິກົມການເມືອງສູນກາງພັກ ກ່ຽວກັບສາມສ້າງ ແລະ ຖືກກັບຈິດໃຈຄຳສັ່ງຂອງຄະນະເລຂາທິການສູນກາງພັກ ແນໃສ່ສ້າງແຂວງໃຫ້ເປັນຫົວ ໜ່ວຍຍຸດທະສາດ, ສ້າງບັນດາອົງການສູນກາງ ໃຫ້ເປັນອົງການປະຕິບັດພາລະບົດບາດ ຄຸ້ມຄອງມະຫາພາກເປັນຕົ້ນຕໍ, ສ້າງພັກໃຫ້ປອດໃສເຂັ້ມແຂງ ໜັກແໜ້ນ, ເປັນແບບຢ່າງນຳໜ້າ ແລະ ມີຄວາມສາມາດນຳພາໃນເງື່ອນໄຂໃໝ່. ຕະຫຼອດໄລຍະການກະກຽມກອງປະຊຸມໃຫຍ່ນັ້ນ ຕ້ອງດຳເນີນໄປໂດຍຕິດພັນຢ່າງສະໜິດແໜ້ນ ກັບການສືບຕໍ່ຍູ້ຂະບວນການແຂ່ງຂັນຮັກຊາດ ແລະ ພັດທະນາໃຫ້ແຂງແຮງ, ຟົດຟື້ນ ແລະ ຕໍ່ເນື່ອງ, ຕິດພັນກັບການກະກຽມ ແລະ ສະເຫຼີມສະຫຼອງ ວັນປະຫວັດສາດຂອງພັກ ແລະ ຂອງຊາດໃນປີ 2015.
3. ກ່ຽວກັບການເຮັດທົດລອງວຽກງານສາມສ້າງ ແລະ ການສືບຕໍ່ປັບປຸງລະບົບການເມືອງຢູ່ຂັ້ນທ້ອງຖິ່ນ ຕິດພັນກັບວຽກງານສາມສ້າງ. 
ກອງປະຊຸມຄົບຄະນະໄດ້ໃຫ້ທັດສະນະວ່າ: ການເຮັດທົດລອງວຽກສາມສ້າງແມ່ນ ການຄົ້ນຄວ້າປະດິດສ້າງໃນ ການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IX ຂອງພັກ ໃຫ້ລົງສູ່ລວງເລິກ. ຜ່ານການເຮັດທົດລອງໃນໄລຍະ 2 ປີທີ່ຜ່ານມາເຫັນວ່າ: ວຽກງານດັ່ງກ່າວ, ໂດຍລວມແລ້ວແມ່ນເຮັດຖືກທິດ ແລະ ໄດ້ຮັບຜົນສຳເລັດໃນເບື້ອງຕົ້ນ, ເປັນຕົ້ນແມ່ນໄດ້ເຮັດໃຫ້ລະບົບການເມືອງຢູ່ຂັ້ນທ້ອງຖິ່ນຮາກ ຖານໄດ້ຮັບການປັບປຸງໃຫ້ໜັ ແໜ້ນເຂັ້ມແຂງຂຶ້ນຕື່ມ ຕິດພັນກັບການແບ່ງຂັ້ນຄຸ້ມຄອງລະຫວ່າງສູນກາງ ກັບທ້ອງຖິ່ນຮາກຖານ ຕາມທິດເສີມຂະຫຍາຍ ສິດເປັນເຈົ້າຂອງທ້ອງຖິ່ນໃຫ້ຫຼາຍຂຶ້ນ ຊຶ່ງພວມໄດ້ຮັບການປັບປຸງບູລະນະ ແລະ ເຂົ້າສູ່ການຈັດຕັ້ງປະຕິບັດຕົວຈິງເປັນກ້າວໆ; ຄຽງຄູ່ກັນນັ້ນຂະບວນການແຂ່ງຂັນຮັກຊາດ ແລະ ພັດທະນາກໍໄດ້ຮັບການປຸກລະດົມຢ່າງກວ້າງຂວາງ ອັນໄດ້ນຳຜົນປະໂຫຍດຕົວຈິງມາໃຫ້ປະຊາຊົນ, ໂສມໜ້າຊົນນະບົດຂອງປະເທດເຮົາມີການຫັນປ່ຽນໃໝ່ຢ່າງຈະແຈ້ງ.  ຜ່ານການສະຫຼຸຸບຕີລາຄາເບື້ອງຕົ້ນເຫັນວ່າວຽກງານສາມສ້າງ ເປັນບາດກ້າວບຸກທະລຸທີ່ສຳຄັນຂອງພັກເຮົາ ໃນດ້ານທິດສະດີ ແລະ ພຶດຕິກຳ ທີ່ຄວນໄດ້ສືບຕໍ່ຄົ້ນຄວ້າໃຫ້ຈະແຈ້ງ ແລະ ຊັດເຈນ ເພື່ອເປັນພື້ນຖານວິທະຍາສາດ ທີ່ຈະສືບຕໍ່ຜັນຂະຫຍາຍເຂົ້າສູ່ຕົວຈິງໃຫ້ເລິກເຊິ່ງກ່ວາເກົ່າ.
   ກອງປະຊຸມຄົບຄະນະຄັ້ງນີ້ໄດ້ຢືນຢັນວ່າ ວຽກງານສາມສ້າງແມ່ນຍຸດທະສາດ ທັງແມ່ນມາດຕະການສະເພາະໜ້າ ແລະ ຍາວນານຂອງພັກ ແນໃສ່ສ້າງຄວາມໝັ້ນຄົງໃຫ້ແກ່ ລັດປະຊາທິປະໄຕ ປະຊາຊົນ ໂດຍສ້າງຄວາມເຂັ້ມແຂງແຕ່ຮາກຖານຂຶ້ນມາ, ຊຸກຍູ້ພາລະກິດປ່ຽນ ແປງໃໝ່ ໂດຍສະເພາະໃນຂົງເຂດເສດຖະກິດ ໃຫ້ມີການພັດທະນາຢ່າງແຂງແຮງ ຕາມກົນໄກຕະຫຼາດທີ່ມີການຄຸ້ມຄອງຂອງລັດ, ບັນລຸເປົ້າໝາຍສະຫັດສະວັດດ້ານການພັດທະນາ ແລະ ກຽມພື້ນຖານອັນໜັກແໜ້ນໃຫ້ແກ່ການນຳເອົາປະເທດເຮົາຫຼຸຸດພົ້ນອອກ ຈາກສະຖານະພາບປະເທດ ດ້ອຍພັດທະນາໃນປີ 2020 ແລະ ສືບຕໍ່ກ້າວຂຶ້ນຢ່າງໜັກແໜ້ນສູ່ຈຸດໝາຍສັງຄົມນິຍົມ.
4. ກ່ຽວກັບການກະກຽມ ເນື້ອໃນກອງປະຊຸມໃຫຍ່ ຄັ້ງທີ 10 ຂອງພັກ. 
ກອງປະຊຸມຄົບຄະນະໄດ້ ເຫັນດີທາງດ້ານຫຼັກການຕໍ່ເນື້ອໃນຮ່າງລາຍງານການເມືອງ ສະບັບທີ 2 ກໍຄືຮ່າງແຜນພັດທະນາເສດຖະກິດ-ສັງ ຄົມແຫ່ງຊາດ 5 ປີ ຄັ້ງທີ 8, ຮ່າງແຜນ ຍຸດທະສາດຮອດປີ 2025 ແລະ ຮ່າງວິໄສທັດຮອດປີ 2030. ມອບໃຫ້ອະນຸກຳມະການເນື້ອໃນ ສືບຕໍ່ປັບປຸງໃຫ້ມີເນື້ອໃນຄົບຖ້ວນ, ສ່ອງແສງໃຫ້ເຫັນສະພາວະຄວາມເປັນຈິງຂອງປະເທດເຮົາ, ພ້ອມກັນນັ້ນກໍສອດຄ່ອງກັບເງື່ອນໄຂແຫ່ງການ ເຊື່ອມໂຍງພາກພື້ນ ແລະ ສາກົນ.
5. ກ່ຽວກັບການປັບປຸງລັດ ຖະທຳມະນູນ ສະບັບປີ 2003. 
ກອງປະຊຸມຄົບຄະນະໄດ້ໃຫ້ທັດສະນະວ່າ: ການປັບປຸງລັດຖະທຳມະນູນ ສະບັບປີ 2003 ແມ່ນມີຄວາມຈຳເປັນ ແລະ ສໍາຄັນຫຼາຍ ເພາະເປັນການຫັນເອົາແນວທາງຂອງພັກ ໃຫ້ເປັນລັດຖະທຳມະນູນ ແລະ ກົດໝາຍຂອງຊາດ ຕາມທິດແຫ່ງການສ້າງລັດທີ່ປົກຄອງດ້ວຍກົດໝາຍ,​ ປັບປຸງບູລະນະລະບົບອຳນາດແຫ່ງລັດໃຫ້ເຂັ້ມແຂງ ເພື່ອບັນລຸເປົ້າໝາຍນຳພາປະເທດຊາດໃຫ້ຫຼຸຸດພົ້ນອອກຈາກສະຖານະພາບ ປະ ເທດດ້ອຍພັດທະນາໃນປີ 2020 ແລະ  ສ້າງພື້ນຖານອັນໜັກແໜ້ນ ຕາມທິດພັດທະນາແບບຍືນຍົງສູ່ຈຸດໝາຍສັງຄົມນິຍົມ.
   ກອງປະຊຸມຄົບຄະນະມອບໝາຍໃຫ້ຄະນະກຳມະການລະດັບຊາດ ເພື່ອປັບປຸງລັດຖະທຳມະນູນ ສົມທົບກັບພາກສ່ວນຕ່າງໆທີ່ກ່ຽວ ຂ້ອງຢູ່ຂັ້ນສູນກາງ ແລະ ທ້ອງຖິ່ນ ຈັດຕັ້ງສຳມະນາວິທະຍາສາດ, ທາບທາມ ແລະ ລະດົມຄວາມຄິດຄວາມເຫັນ ຈາກບັນດາອົງການຈັດຕັ້ງຂອງພັກ, ລັດ, ແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນ ພ້ອມດ້ວຍຕົວແທນທຸກພາກສ່ວນເສດຖະກິດ, ທຸກຊັ້ນຄົນ, ທຸກເຜົ່າ, ທຸກເພດໄວ ເພື່ອເຮັດໃຫ້ລັດຖະທຳມະນູນສ່ອງແສງຢ່າງຄົບຖ້ວນເຖິງຄວາມມຸ້ງມາດປາຖະໜາຂອງປວງຊົນທັງຊາດ, ສອດຄ່ອງກັບຈຸດພິເສດ, ມູນເຊື້ອ, ບົດຮຽນ ແລະ ສະພາບການຕົວຈິງຂອງປະເທດເຮົາ.
    ນອກຈາກ 5 ເນື້ອໃນທີ່ກ່າວມາເທິງນັ້ນແລ້ວ ກອງປະຊຸມຄົບຄະນະຍັງໄດ້ຮັບຟັງການລາຍງານກ່ຽວກັບການເຄື່ອນໄຫວນໍາພາ, ຊີ້ນຳຂອງກົມການເມືອງ ແລະ ຄະນະເລຂາທິການສູນກາງພັກ ໃນໄລຍະ 6 ເດືອນທີ່ຜ່ານມາ ຊຶ່ງກອງປະຊຸມຄົບຄະນະໄດ້ເປັນເອກະພາບຕີລາ ຄາວ່າ ກົມການເມືອງ ແລະ ຄະນະເລຂາທິການສູນກາງພັກ ໄດ້ປະຕິບັດພາລະບົດບາດ ແລະ ໜ້າທີ່ຂອງຕົນຢ່າງຖືກຕ້ອງຕາມກົດລະບຽບຂອງພັກ ແລະ ມະຕິຂອງຄະນະບໍລິຫານງານສູນກາງພັກ. ພ້ອມກັນນັ້ນກອງປະຊຸມຄົບຄະນະກໍໄດ້ມອບໃຫ້ກົມການເມືອງ ແລະ ຄະນະເລຂາທິການສູນກາງພັກ ສືບຕໍ່ຊີ້ນຳວຽກງານຈຸດສຸມຈຳນວນໜຶ່ງ ໃນ 6 ເດືອນຕໍ່ໜ້າ ໂດຍສະເພາະແມ່ນສຸມໃສ່ຊີ້ນໍາວຽກງານສຶກສາອົບ ຮົມການ ເມືອງ, ນຳພາແນວຄິດໃຫ້ຖັນແຖວພະນັກງານ, ສະມາຊິກພັກ, ທະຫານ, ຕຳຫຼວດ ແລະ ປະຊາຊົນທຸກເຜົ່າ, ທຸກຊັ້ນຄົນ ໃຫ້ມີຄວາມຮັບຮູ້ເຂົ້າໃຈແນວທາງປ່ຽນແປງໃໝ່ຂອງພັກ ແລະ ສະພາບການຕ່າງໆທີ່ເກີດຂຶ້ນໃນແຕ່ລະໄລຍະຢ່າງຖືກຕ້ອງ, ຮັບປະກັນສະຖຽນລະພາບທາງການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ແກ້ໄຂບັນດາປະກົດການຫຍໍ້ທໍ້ໃນສັງຄົມໃຫ້ຫຼຸຸດໜ້ອຍຖອຍລົງເທື່ອລະກ້າວ, ພ້ອມກັນນັ້ນ ກໍຊີ້ນຳການກະກຽມດ້ານຕ່າງໆໃຫ້ແກ່ການດຳເນີນກອງປະຊຸມໃຫຍ່ອົງຄະນະພັກຂັ້ນແຂວງ,​ ນະຄອນ ແລະ ອົງການອ້ອມ ຂ້າງສູນກາງ ຕິດພັນກັບການກະກຽມ ແລະ ສະເຫຼີມສະຫຼອງສອງວັນປະຫວັດສາດ; ຊີ້ນຳການຄຸ້ມຄອງເສດ ຖະກິດມະຫາພາກໃຫ້ມີຄວາມໝັ້ນທ່ຽງ ແລະ ຊີ້ນຳການບັນລຸເປົ້າໝາຍສະຫັດສະວັດດ້ານການພັດທະນາ; ຊີ້ນຳການພົວພັນ ແລະ ເຄື່ອນໄຫວຕ່າງປະເທດຂອງພັກ ແລະ ລັດ ເປັນຕົ້ນແມ່ນການກະກຽມຄວາມພ້ອມ ເພື່ອເຂົ້າຮ່ວມປະຊາຄົມເສດຖະກິດອາຊຽນ ແລະ ການເຊື່ອມໂຍງສາກົນ; ດ້ານໜຶ່ງອີກທີ່ສຳຄັນແມ່ນໃຫ້ສຸມໃສ່ຊີ້ນຳ ການກະກຽມກອງປະຊຸມໃຫຍ່ ຄັ້ງທີ 10 ຂອງພັກ ໃຫ້ໄດ້ດຳເນີນໄປຕາມຄາດໝາຍທີ່ວາງໄວ້.
    ຄະນະບໍລິຫານງານສູນກາງພັກ ຮຽກຮ້ອງມາຍັງທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຈົ່ງພ້ອມກັນເພີ່ມທະວີມູນເຊື້ອແຫ່ງຄວາມສາມັກຄີເປັນປຶກແຜ່ນແໜ້ນໜາ, ເສີມຂະຫຍາຍ ນ້ຳໃຈຮັກຊາດ, ຮັກລະບອບໃໝ່,​ ສຸມສະຕິປັນຍາ, ກຳລັງຊັບ ແລະ ກຳລັງກາຍເຂົ້າໃສ່ພາລະກິດປົກປັກຮັກສາ ແລະ ສ້າງສາປະເທດຊາດ ໂດຍຕັ້ງໜ້າເປັນເຈົ້າການເຂົ້າຮ່ວມ ໃນຂະບວນການແຂ່ງຂັນຮັກຊາດ ແລະ ພັດທະນາ ເພື່ອເຮັດໃຫ້ປີສຸດທ້າຍແຫ່ງການຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 7 ບັນລຸຄາດໝາຍທີ່ວາງໄວ້; ສ້າງຜົນງານອັນໃຫຍ່ຫຼວງ ເພື່ອຄຳນັບຮັບຕ້ອນວັນສ້າງ ຕັ້ງພັກ ປະຊາຊົນ ປະຕິວັດລາວ ທີ່ມີກຽດສະຫງ່າ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ ທັງເປັນການຍູ້ຂະບວນການຮອບດ້ານ ເພື່ອຄຳນັບຮັບຕ້ອນກອງປະຊຸມໃຫຍ່ ຄັ້ງທີ 10 ຂອງພັກ ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.

ກົດໝາຍແຫ່ງ ສປປ ລາວ

ຄໍາເຫັນຂອງ ທ່ານ ສຈ.ດຣ ກິແກ້ວ ໄຂຄຳພິທູນ ຫົວໜ້າ ຄອສພ ຕໍ່ເວັບໄຊສ

ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 64 ປີ

ປະທານ ໄກສອນ ພົມວິຫານ ຢືນຢົງໃນພາລະກິດປະຕິວັດຂອງພວກເຮົາຕະຫລອດໄປ

ຊົມເຊີມວັນສ້າງຕັ້ງ ສປປ ລາວ ຄົບຮອບ 43 ປີ ຢ່າງສຸດໃຈ.

ກອງປະຊຸມໃຫຍ່ຜູ້ແທນທົ່ວປະເທດ ຂອງ ພັກປະຊາຊົນ ປະຕິວັດລາວ

ເຊື່ອມຕໍ່ເວັບໄຊສ

ເລກໂທ ສຸກເສີນ

ແຈ້ງ​ໄຟ​ໄໝ້ : 1190

   ຕຳຫຼວດ : 1191

ລົດ​ໂຮງໝໍ : 1195

​     ໄຟຟ້າ : 1199

  ນ້ຳ​ປະປາ : 1169

ໜ່ວຍກູ້​ໄພ : 1624

ຈຳນວນຄົນອອນໄລ໌ທ

ມີ 30  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ:

1224132
ມື້ນີ້ມື້ນີ້91
ມື້ວານນີ້ມື້ວານນີ້106
ອາທິດນີ້ອາທິດນີ້593
ເດືອນນີ້ເດືອນນີ້2217
ທັງໝົດທັງໝົດ1224132