ທ່ານ ສີປະເສີດ ແສນສະຫວັດ ຄະນະພັກ ຮອງຫົວໜ້າ...

ສ້າງຂື້ນເມື່ອ ວັນພະຫັດ, 28 ມີນາ 2019 10:10
ຂຽນໂດຍ ຄອນສະຫວັນ

ທ່ານ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ຕ້ອນຮັບການເຂົ້າຢ້ຽມ ຢາມ ແລະ ພົບປະຂອງ ຄະນະບໍລິສັດກວາງຊີສື່ວິທະຍຸ-ໂທລະພາບແບບໃໝ່ຈຳກັດ.

     ໃນຕອນເຊົ້າຂອງວັນທີ 25 ມີນາ 2019ຜ່ານມາ, ທ່ານ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມ ແລະ

ພົບປະຂອງທ່ານ ລ້ຽວຢູ່ຕົ່ງ ຜູ້ອຳນວຍການບໍລິສັດກວາງຊີສື່ວິທະຍຸ-ໂທລະພາບແບບໃໝ່ຈຳກັດພ້ອມດ້ວຍຄະນະ ທີ່ ຫ້ອງຮັບແຂກ ຊັ້ນ 5 ຂອງ ຄະນະໂຄສະນາອົບຮົມສູນກາງພັກ; ເຂົ້າຮ່ວມມີ: ຫົວໜ້າກົມສັງລວມ, ຫົວໜ້າກົມຂໍ້ມູນຂ່າວສານ, ຮອງຫົວໜ້າກົມຈັດຕັ້ງ ແລະ ຫ້ອງການ ຄອສພ.

ໃນໂອກາດທີ່ມີຄວາມໝາຍ ຄວາມສໍາຄັນດັ່ງກ່າວ ທ່ານສີປະເສີດ ແສນສະ ໄດ້ຕີລາຄາສູງຕໍ່ການເດີນທາງມາເຮັດວຽກ ແລະ ຢ້ຽມຢາມສປປ ລາວຄັ້ງນີ້ຂອງຄະນະຜູ້ແທນ, ຈາກທ່ານຮອງຫົວໜ້າ ຄອສພ ຍັງໄດ້ລາຍງານສະພາບການທີ່ພົ້ນເດັ່ນ ແລະ ຜົນງານການເຄື່ອນໄຫວໃນການຈັດຕັ້ງປະຕິບັດໜ້າທີ່, ພາລະບົດບາດຂອງຄະນະໂຄສະນາອົບຮົມສູນກາງພັກປະຕິບັດຕາມທິດຊີ້ນໍາຂອງ ກົມການ ເມືອງສູນກາງພັກ ຕໍ່ ທ່ານ ລ້ຽວຢູ່ຕົງ, ພ້ອມທັງເຊີນຊວນຄະນະຜູ້ແທນບໍລິສັດກວາງຊີສື່ວິທະຍຸ-ໂທລະພາບແບບໃໝ່ຈຳກັດ ກໍ່ຄືປະຊາຊົນຈີນເຂົ້າມາທ່ອງທ່ຽວ ສປປລາວ ນັບມື້ນັບເພີ່ມຂື້ນໃນປີທ່ອງທ່ຽວລາວ-ຈີນປີ 2019. ພ້ອມທັງ ຕີລາຄາສູງຕໍ່ການພົວພັນແບບຄູ່ຮ່ວມຍຸດທະສາດ ລະຫວ່າງ ລາວ ແລະ ຈີນ ທີ່ນັບມື້ນັບໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງ, ສອງຝ່າຍ ເຫັນດີໃຫ້ສືບຕໍ່ຊຸກຍູ້ພາກສ່ວນກ່ຽວຂ້ອງ, ໃນການຮ່ວມມື, ປະສານສົມທົບ ແລະ ການສະໜັບສະໜູນເຊິ່ງກັນ ແລະ ກັນກ່ຽວກັບການແລກປ່ຽນວັດທະນະທຳ, ຂໍ້ມູນຂ່າວສານ, ການສື່ສານ ແລະ ອຶ່ນໆ ພ້ອມທັງແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ຢ່າງກົງໄປກົງມາຕໍ່ສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ. ໃນການເດີນທາງມາເຮັດວຽກ ແລະຢ້ຽມຢາມສປປ ລາວໃນຄັ້ງນີ້ມີຈຸດປະສົງເພື່ອແນະນຳໃນຫົວຂໍ້ ”ຫົວລີ້ປົວ” ເຂດສະເພາະຮູບເງົາຈີນ-ອາຊຽນ 2019 ມາແລກປ່ຽນວັດທະນະທຳລາວ-ຈີນ, ສົ່ງເສີມການຮ່ວມມືໃນວຽກງານພາບ ແລະ ສຽງ.

       ໃນໂອກາດດຽວກັນນີ້, ທ່ານລ້ຽວຢູ່ຕົ່ງ ຜູ້ອຳນວຍການບໍລິສັດກວາງຊີສື່ວິທະຍຸ-ໂທລະພາບແບບໃໝ່ຈຳກັດ ໄດ້ສະແດງຄວາມຂອບໃຈຕໍ່ເປັນຢ່າງສູງຕໍ່ການນຳ ຄອສພ ທີ່ໄດ້ໃຫ້ກຽດຕ້ອນຮັບຢ່າງອັນອົບອຸ່ນ ແລະ ສະແດງຄວາມຍິນດີຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວ ພັນມິດຕະພາບ, ການພົວພັນແບບຄູ່ຮ່ວມຍຸດທະສາດ ສອງພັກ-ສອງລັດຖະບານ ກໍຄື ປະຊາຊົນສອງຊາດ ລາວ-ຈີນ ໃຫ້ນັບມື້ນັບໄດ້ຮັບການເສີມຂະຫຍາຍທັງທາງກວ້າງ ແລະ ທາງເລິກ ນຳເອົາຜົນປະໂຫຍດຕົວຈິງມາໃຫ້ແກ່ສອງປະເທດ.