ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 63 ປີ ຢ່າງສຸດໃຈ.                                                                                                                                                                           ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ.                                                                                                                                                                               ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ.                                                                                                                                                                       ຊົມເຊີຍວັນສ້າງຕັ້ງ ສປປ ລາວ ຄົບຮອບ 42ປີ.  

ເອກະສານໂຄສະນາ - ປາຖະກະຖາ ວັນສະຖາປະນາ ສປປ ລາວ ຄົບຮອບ 40 ປີ

ເອກະສານໂຄສະນາ - ປາຖະກະຖາ ວັນສະຖາປະນາ ສປປ ລາວ ຄົບຮອບ 40 ປີ

( 2/12/1975 - 2/12/2015 )

          I. ມູນເຊື້ອ ແລະ ຄວາມໝາຍສຳຄັນຂອງວັນຊາດ 2  ທັນວາ

          - ຊາດລາວແມ່ນຊາດໜຶ່ງທີ່ມີປະຫວັດສາດອັນຍາວນານຫຼາຍພັນປີ, ມີມູນເຊື້ອທີ່ສະຫງ່າອົງອາດ ແຫ່ງການຕໍ່ສູ້ຕ້ານການຮຸກຮານຂອງສັດຕູຈາກພາຍນອກແລະ ສ້າງສາພັດທະນາ.

         

ໂດຍສືບທອດມູນເຊື້ອອັນອົງອາດຂອງບັນພະບູລຸດດັ່ງກ່າວນັ້ນ, ປະຊາຊົນລາວບັນດາເຜົ່າພາຍໃຕ້ການນຳພາຂອງພັກປະຊາຊົນປະຕິວັດລາວໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ໃໝ່ສາມາດປົດປ່ອຍປະເທດຊາດຢ່າງມີໄຊ, ສ້າງຕັ້ງສາທາລະນະລັດປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ລັດປະຊາທິປະໄຕ ປະຊາຊົນ ແມ່ນລັດທີ່ເກີດຈາກການຕໍ່ສູ້ເສຍສະຫຼະອັນໃຫຍ່ຫຼວງຂອງປະຊາຊົນລາວບັນດາເຜົ່າ, ລັດທີມາຈາກປະຊາຊົນ, ລັດແຫ່ງອຳນາດຂອງປະຊາຊົນ ແລະ ເພື່ອປະຊາຊົນ.

          ວັນທີ 2 ທັນວາແມ່ນວັນທີ່ມີຄວາມໝາຍຄວາມສຳຄັນ ສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວ.

          - ວັນທີ 2 ທັນວາ ປີ 1975 ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ; ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງ ອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ.

          - ວັນທີ 2 ທັນວາ ແມ່ນວັນແຫ່ງສັນຕິພາບ, ວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນ.

          ປະທານ ໄກສອນ ພົມວິຫານ ໄດ້ຕີລາຄາວັນທີ 2 ທັນວາ ປີ 1975 ດັ່ງນີ້: '' ບໍ່ທັນມີເວລາໃດທີ່ປະຊາຊົນ ເຮົາເຊິ່ງເປັນຜູ້ສ້າງປະຫວັດສາດຂອງຊາດນັ້ນ ໄດ້ຍາດເອົາໄຊຊະນະສົມບູນ, ເຖິງຖອງ ແລະ ບໍລິບູນໄດ້ຢ່າງສະຫງ່າລາສີຄືແນວນີ້ຈັກເທື່ອ. ໄຊຊະນະນັ້ນ ບໍ່ສະເພາະແຕ່ໄດ້ຟື້ນຟູຄວາມເປັນເອກະລາດຂອງປະເທດເຮົາ, ຫາກຍັງເປັນຄັ້ງທຳອິດທີ່ ປະຊາຊົນບັນດາເຜົ່າ ຜູ້ເຄີຍດຳລົງຊີວິດເປັນທາດໄດ້ກາຍມເປັນເຈົ້າຂອງແທ້ຈິງຂອງຊາດໜຶ່ງ ທີ່ມີເອກະລາດ, ມີອິດສະຫຼະພາບຢ່າງສົມບູນ ແລະ ພວມກ້າວຂຶ້ນສັງຄົມນິ ຍົມ, ເຮັດໃຫ້ຄວາມມຸ່ງຫວັງອັນແຮງກ້າຂອງປວງຊົນລາວ ກໍຄືຂອງມວນມະນຸດປະກົດເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ ''.

        II. ຜົນສຳເລັດໃນການປົກປັກຮັກສາ ແລະ ພັດທະນາປະເທດຊາດ ໃນໄລຍະ 40 ປີ.

- ໄລຍະ10  ປີຕົ້ນແຫ່ງການປົກປັກຮັກສາ ແລະ ພັດທະນາປະເທດຊາດ ( 1975 - 1985 ) . ປະເທດເຮົາໄດ້ປະເຊີນກັບຄວາມຫຍຸ້ງຍາກຫຼາຍປະການເຊັ່ນ: ໄດ້ຮັບຜົນຮ້າຍອັນໜັກໜ່ວງຈາກສົງຄ, ຈຸດເລີ່ມ ຕົ້ນຂອງປະເທດເຮົາຍັງຕ່ຳເກີນໄປ, ຊາວກະຊິກອນກວມເອົາກວ່າ 90% ຂອງປະຊາກອນ, ລະ ດັບຄວາມຮູ້ຂອງປະຊາຊົນຕ່ຳ, ປະຊາຊົນກືກໜັງສືປະມານ 90% ຂອງພົນລະເມືອງ, ບໍ່ທັນມີກົນໄກຄຸ້ມຄອງເສດຖະກິດ ທີ່ຄົບຊຸດ ແລະ ສອດຄ່ອງ; ສະພາບແວດລ້ອມຫຼາຍອັນບໍ່ອຳນວຍ, ພວກອິດທິກຳລັງປໍລະປັກ ແລະ ພວກຄົນບໍ່ດີ ບໍ່ໄດ້ລົດລະໃນການທຳລາຍມ້າງເພ ລະບອບໃໝ່ພວກເຮົາ; -ແຕ່ຍ້ອນພວກເຮົາມີຄວາມສາມັກຄີ ຕັດສີນໃຈບຸກບືນກ້າວຂຶ້ນຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນ ດາເຜົ່າ ພາຍໃຕ້ການນຳພາຂອງພັກ ທີ່ມີແນວທາງຖືກຕ້ອງ ບວກກັບການຊ່ວຍເຫຼືອອັນລ້ຳຄ່າຂອງເພ່ືອນມິດ ແລະ ສາກົນ. ພວກເຮົາຈຶ່ງສາມາດປົກປັກຮັກສາເອກກະລາດ, ອະທິປະໄຕ ແລະ ປົກປັກຮັກສາລະ ບອບໃໝ່ໄວ້ ຢ່າງໝັ້ນຄົງ, ປະເທດຊາດມີຄວາມສະຫງົບ, ມີຄວາມເປັນລະບຽບຮຽບຮ້ອຍເທື່ອລະກ້າວ. ສາມາດປະຕິບັດບັນດາຈຸດໝາຍຂອງແຜນພັດທະນາເສດຖະກິດສັງຄົມ 5 ປີ ແຫ່ງລັດ ຄັ້ງທີ I ສຳເລັດໂດຍພື້ນຖານ, ອັນໄດ້ປະກອບສ່ວນສ້າງປະຖົມປັດໄຈ  ແລະ ເງື່ອນໄຂສະດວກໃຫ້ແກ່ການສືບຕໍ່ກ້າວຂຶ້ນຂອງປະເທດເຮົາ.

- ນັບແຕ່ປີ 1986 ເປັນຕົ້ນມາ, ພາຍໃຕ້ແນວທາງປ່ຽນແປງໃໝ່ອັນຖືກຕ້ອງຂອງພັກເຮົາການພັດ ທະນາເສດຖະກິດສັງຄົມ ຂອງ ສປປ ລາວ ໄດ້ມີຜົນສຳເລັດອັນສຳຄັນ ແລະ ມີບາດກ້າວຂະຫຍາຍຕົວຕໍ່ເນື່ອງ, ໝັ້ນທ່ຽງ, ຍອດຜະລິດຕະພັນພາຍໃນເພີ່ມຂຶ້ນໃນແຕ່ລະໄລຍະເຊັ່ນ: 1986 - 1990 ສະເລ່ຍ 4,8% ຕໍ່ປີ, 1991 - 1995 ເພີ່ມຂຶ້ນ 6,4%, 1996 - 2005 ໄດ້ 6,2% ຕໍ່ປີ, 2006 - 2010 ສະເລ່ຍ 7,9%, ສົກ-ໍປີ 2012 - 2013 ໄດ້8,0%. ລາຍຮັບຂອງປະຊາຊົນ ກໍໄດ້ເພີ່ມຂຶ້ນເຊັ່ນ: ປີ 1985 ລາຍຮັບສະເລ່ຍຕໍ່ຫົວຄົນໄດ້ 114 ໂດລາ, ປີ 1995 ໄດ້ 380 ໂດລາ, ປີ 2006 ໄດ້ 534 ໂດລາ, ປີ 2012 ບັນລຸໄດ້ 1.355 ໂດລາ, ປີ 2013  ໄດ້ 12,07 ລ້ານກີບ ຫຼື ປະມານ 1.534 ໂດລາ ແລະ ປີ 2014 ບັນລຸໄດ້ 1.692 ໂດລາສະຫະລັດ.

- ການພັດທະນາເສດຖະກິດ - ສັງຄົມ ໄດ້ຮັບການຂະຫຍາຍຕົວເປັນກ້າວໆສະແດງອອກໃນການພັດທະນາແຕ່ລະດ້ານດັ່ງນີ້:

          ດ້ານກະສິກຳ: ໂດຍອີງໃສ່ຈຸດພິເສດຂອງປະເທດເຮົາເປັນປະເທດກະສິກຳ; ພັກ-ລັດ ໄດ້ເອົາໃຈໃສ່ການພັດທະນາກະສິກຳ-ປ່າໄມ້, ເອົາການກະສິກຳປ່າໄມ້ເປັນສະໜາມຮົບນ້ຳເບີໜຶ່ງ ຕົ້ນຕໍແມ່ນສຸມໃສ່ແກ້ໄຂບັນຫາເຂົ້າ ແລະ ທັນຍາຫານ, ຢຸດຕິການຖາງປ່າເຮັດໄຮ່, ຈັດສັນອາຊີບຄົງທີ່, ມອບດິມອບ ປ່າໃຫ້ປະຊາຊົນນຳໃຊ້, ປົກປັກຮັກສາ ແລະ ຟື້ນຟູບູລະນະປ່າໄມ້ບໍ່ໃຫ້ບົກແຫ້ງ.

          ລະດັບການຂະຫຍາຍຕົວຂອງຂະແໜງກະສິກຳໃນປີ 1976 ຜະລິດເຂົ້າໄດ້ທັງໝົດ 660.938 ໂຕນ ໃນເນື້ອທີ່ 524.564 ເຮັກຕາ, ສະມັດຕະພາບການຜະລິດ 1,26 ໂຕນຕໍ່ເຮັກຕາ; ປີ 1980 ຜະ ລິດໄດ້ 1.053.128 ໂຕນ ເນື້ອທີ່ 732.050 ເຮັກຕາ, ສະມັດຕະພາບການຜະລິດ 1,44 ໂຕນຕໍ່ເຮັກຕາ; ປີ 1990 ຜະລິດໄດ້ 1.491.495 ໂຕນ ເນື້ອທີ່ 650.300 ເຮັກຕາ, ສະມັດຕະພາບການຜະລິດ 2,29 ໂຕນຕໍ່ເຮັກຕາ; ປີ 2000 ຜະລິດໄດ້ 2.201.700 ໂຕນເນື້ອທີ່ 719.370 ເຮັກຕາ, ສະມັດຕະພາບການຜະລິດ 3,06 ໂຕນຕໍ່ເຮັກຕາ ; ປີ 2010 ຜະລິດໄດ້ 2.321.330 ໂຕນ ເນື້ອທີ່  627.865 ເຮັກຕາ, ສະມັດຕະພາບການຜະລິດ 3,71 ໂຕນຕໍ່ເຮັກຕາ; ປີ 2014 ຜະລິດໄດ້ 4.002.425 ໂຕນ ເນື້ອທີ່ 979.345 ເຮັກຕາ, ສະມັດຕະພາບການຜະລິດ 4,18 ໂຕນຕໍ່ເຮັກຕາ. ສາມາດຕອບສະໜອງການບໍລິ ໂພກໄດ້ໂດຍພື້ນຖານ; ການປູກພືດສະບຽງ, ພືດເປັນສິນຄ້າ, ພືດອຸດສາຫະກຳເປັນຕົ້ນ ປູກຕົ້ນໄມ້ໃຫ້ໝາກ, ຕົ້ນໄມ້ອຸດສາຫະກຳ ກໍໄດ້ຂະຫຍາຍຕົວເພີ່ມຂຶ້ນທັງເນື້ອທີ່ປູກ ແລະ ຜົນຜະລິດ; ການສະໜອງຊີ້ນກໍມີຈຳນວນເພີ່ມຂຶ້ນຈາກການລ້ຽງແບບທຳມະຊາດ ຫັນມາລ້ຽງແບບເປັນຟາມ ກໍນັບ​ມື້ຂະຫຍາຍຕົວເຊັ່ນ ປີ 2013 ມີຟາມງົວ 287 ຟາມ, ໝູ 762 ຟາມ, ແບ້ ແກະ 91 ຟາມ, ສັດປີກ 428 ຟາມ, ປາກະຊັງ 161 ຟາມ.

          ດ້ານພະລັງງານ ແລະ ບໍ່ແຮ່: ມີການພັດທະນາທີ່ຕັ້ງໜ້າ, ຈາກ 1 ເຂື່ອນໃນປີ 1975 ເປັນ 30 ເຂື່ອນໃນປີ 2015 ເປັນຕົ້ນແມ່ນເຂື່ອນໄຟຟ້າເທີນຫີນບູນພາກຂະຫຍາຍ, ນ້ຳງື່ມ 5 ແລະ ເຊຂະໝານ 3 ສຳລັບໂຄງ ການຂະໜາດໃຫຍ່ແມ່ນ ໂຄງການຫົງສາລິກໄນ, ເຂື່ອນໄຊຍະບູລີ, ເຂື່ອນນ້ຳອູ 2, ເຂື່ອນນ້ຳອູ 5, ນ້ຳອູ 6, ເຊປ່ຽນ ເຊນ້ຳນ້ອຍ ແລະ ເຂື່ອນນ້ຳງຽບ 1 ສາມາດຜະລິດພະລັງງານໄຟຟ້າໄດ້ທັງໝົດ 5.205 ເມກາວັດ ແລະ ສາມາດສະໜອງກະແສໄຟຟ້າໃຫ້ທຸກໆເທດສະບານແຂວງ ແລະ ເມືອງ, ອັດຕາການເພີ່ມຂຶ້ນຂອງໄຟຟ້າສະເລ່ຍ29,61% ຕໍ່ປີ, ຮອດປະຈຸບັນ ກວມ89% ຂອງຄອບຄົວທັງໝົດທົ່ວປະເທດ.  

ບໍ່ແຮ່ເປັນຂະແໜງການໜຶ່ງທີ່ສ້າງລາຍຮັບໃຫ້ປະເທດຊາດຫຼາຍພໍສົມຄວນ, ຍອດມູນຄ່າການຜະ ລິດອຸດສາຫະກຳ-ບໍ່ແຮ່ໄດ້ເພີ່ມຂຶ້ນ 15-20% ຕໍ່ປີ. ປະເພດແຮ່ທາດທີ່ຖືກຂຸດຄົ້ນໃນ ສປປ ລາວ ມີ: ຄຳ, ທອງ-ແດງ, ຖ່ານຫີນ, ກົ່ວ, ແກ້ວປະເສີດ, ຫີນປູນຜະລິດຊີມັງ, ຫີນກາວ, ສັງກະສີ, ຟົດຟໍ, ເກືອກິນ ແລະ ອື່ນໆ.

          ດ້ານອຸດສາຫະກຳ ແລະ ການຄ້າ: ພື້ນຖານອຸດສາຫະກຳຈຳນວນໜຶ່ງໄດ້ຮັບການກໍ່ສ້າງ ແລະ ພັດ ທະນາເປັນກ້າວໆ. ໄລຍະຕົ້ນຂອງການປ່ຽນແປງໃໝ່ປີ 1986 - 1990 ອຸດສາຫະກຳ ມີການຂະຫຍາຍ ຕົວຕໍ່ເນື່ອງເພີ່ມຂຶ້ນສະເລ່ຍ 8% ຕໍ່ປີ, ຕົ້ນຕໍແມ່ນຂະແໜງການຜະລິດປຸງແຕ່ງ. ໄລຍະ 2006 - 2010 ສະເລ່ຍອັດຕາການຂະຫຍາຍຕົວຂອງອຸດສາຫະກຳ 12%ຕໍ່ປີ, ໂຮງຈັກ, ໂຮງງານມີຈຳນວນເພີ່ມຂຶ້ນຈາກ 100 ແຫ່ງໃນປີ 1975 ມາເປັນ 26.200 ແຫ່ງໃນປີ 2005 ແລະ ເປັນ 39.872 ແຫ່ງໃນປີ 2013. ອຸດສາຫະກຳປຸງແຕ່ງທີ່ເດັ່ນກວ່າໝູ່ໃນໄລຍະ 2011 - 2013 ແມ່ນອຸດສາຫະກຳຜະລິດລະບຽງອາຫານກວມ 21%, ຊິ້ນສ່ວນອາໄຫລ່ກວມ 18%, ຜະລິດຕະພັນແຮ່ທາດອື່ນໆທີ່ບໍ່ແມ່ນໂລຫະກວມ 16% -ແລະ ການຜະລິດເຄື່ອງດື່ມກວມ 15,5% ຂອງມູນຄ່າອຸດສາຫະກຳປຸງແຕ່ງ. ການຜະລິດນ້ຳ, ນ້ຳຫວານສະໜອງໄດ້ 86%, ຊີມັງ ປະມານ 65%, ເຫລັກເສັ້ນປະມານ 25% ຂອງຄວາມຕ້ອງການທັງໝົດ. ສາມາດສ້າງວຽກເຮັດງານທຳ ແລະ ສ້າງລາຍຮັບເພີ່ມໃຫ້ແກ່ປະຊາຊົນໄດ້ເຖິງ 160.000 ກວ່າຄົນ.

ດ້ານການຄ້າ: ໄດ້ມີການຂະຫຍາຍຕົວຢ່າງກວ້າງຂວາງ, ໃນປີ 2013 ທົ່ວປະເທດມີຕະຫລາດທັງໝົດ 677 ແຫ່ງ, ໃນນັ້ນຕະຫລາດໃຫຍ່ 72  ແຫ່ງ, ກາງ 116 ແຫ່ງ, ນ້ອຍ 300 ແຫ່ງ, ຕະຫລາດນັດ 122 ແຫ່ງ ແລະ ຕະຫລາດຊົນນະບົດ 33 ແຫ່ງ ຊຶ່ງໄດ້ເຮັດໃຫ້ການຈໍລະຈອນແຈກຢາຍສິນຄ້າລົງເຖິງຊົນນະບົດເຂດຫ່າງໄກສອກຫລີກ.

           ດ້ານການຄົມມະນາຄົມຂົນສົ່ງ: ພັກເຮົາ ຖືອົາວຽກງານຄົມມະນາຄົມເປັນປາຍແຫຼມໃຫ້ແກ່ການພັດທະນາເສດຖະກິດ- ສັງຄົມຂອງຊາດນັບແຕ່ ປີ 1975 ເປັນຕົ້ນມາເສັ້ນທາງໃນທົ່ວປະເທດກໍໄດ້ຮັບການປັບປຸງ ແລະ ຂະຫຍາຍຕົວຫຼາຍສົມຄວນ, ມີບັນດາເສັ້ນທາງທີ່ເຊື່ອມຕໍ່ກັບອະນຸພາກພື້ນ, ສັ້ນທາງແລວເສດຖະກິດຕາເວັນອອກ, ຕາເວັນຕົກ, ເໜືອ,ໃຕ້. ປັດຈຸບັນໄດ້ເປີດໃຊ້ບໍລິການລົດໄຟລະຫວ່າງ ທ່ານາແລ້ງ ນະຄອນຫຼວງວຽງຈັນ - ແຂວງໜອງຄາຍ ປະເທດໄທ, ພວມ ສືບຕໍ່ເຈລະຈາ ຄວາມຄືບໜ້າ ໂຄງການສ້າງທາງລົດໄຟຄວາມໄວສູງແຕ່ບໍ່ເຕັນ ນະຄອນຫຼວງວຽງຈັນ; ມີເສັ້ນທາງໄປຮອດເຂດຈຸດສຸມ, ໄປຮອດທຸກແຂວງ, ທຸກເມືອງ, ບ້ານ ແລະ ກຸ່ມບ້ານ, ຖ້າທຽບໃສ່ປີ 1976  ທົ່ວປະເທດມີຄວາມຍາວຂອງເສັ້ນ ທາງພຽງແຕ່ 11.504 ກິໂລແມັດ. ປັດຈຸບັນມີຄວາມຍາວຂອງເສັ້ນທາງທັງໝົດ 51.597,64 ກິໂລແມັດ, ມີຂົວ 2.016  ແຫ່ງ ໃນນັ້ນ ຂົວຂ້າມນ້ຳຂອງລະຫວ່າງປະເທດ 5  ແຫ່ງ.

          ການຂົນສົ່ງທາງອາກາດ, ກໍມີບາດກ້າວຂະຫຍາຍຕົວ, ໄດ້ປັບປຸງສະໜາມບິນໃຫ້ທັນສະໄໝ, ສະໜາມບິນວັດໄຕ ( ນະຄອນຫລວງ-ວຽງ-ຈັນ ) ເປັນສະໜາມບິນສາກົນແຫ່ງທຳອິດໃນປະຫວັດສາດຂອງລາວ ສາມາດຮັບຮອງເອົາຍົນໂບອິງ 747 ລົງຈອດໄດ້, ຍົກລະດັບສະໜາມບິນຫລວງພະບາງ ແລະ ປາກເຊໃຫ້ເປັນສະໜາມບິນພາກພື້ນ, ບັນດາສະໜາມບິນຂອງແຂວງກໍໄດ້ຮັບການກໍ່ສ້າງ ແລະ ປັບປຸງດີຂຶ້ນສາມາດຮັບຮອງເອົາຍົນຂະໜາດນ້ອຍ, ຂະໜາດກາງລົງຈອດໄດ້. ປັບປຸງລະບົບຄຸ້ມຄອງການບິນຜ່ານ, ສາມາດສ້າງລາຍຮັບໄດ້ເພີ່ມຂຶ້ນໃນແຕ່ລະປີ. ປີ 2013 ການບິນສາຍພາຍໃນປະເທດມີການຕີບໂຕສະເລ່ຍປະມານ 2%, ສາຍຕ່າງປະເທດປະມານ 6%, ສະເລ່ຍເຮືອບິນຜ່ານນ່ານຟ້າເພີ່ມຂຶ້ນ 5%.

ວຽກງານໄປສະນີ ໂທລະ-ຄົມມະນາຄົມ: ໄດ້ຂະຫຍາຍຕົວໄວຂຶ້ນ ໃນ-ປີ 1975 ໄດ້ນຳໃຊ້ລະບົບອານາລັອກ, ປີ 1990 ໄດ້ນຳໃຊ້ເຕັກໂນໂລຢີທີ່ກ້າວໜ້າ ແລະ ທັນສະໄໝເຂົ້າມາເຮັດໃຫ້ການບໍລິການດີຂຶ້ນ, ຕໍ່ມາໄດ້ນຳໃຊ້ລະບົບດີຈິຕໍ, ໃຊ້ລະບົບໂທລະສັບມືຖື Global System for Mobile Communications (GSM ). ປີ 1999 ນຳໃຊ້ລະບົບ second - generation ( 2G ). ໃນປີ 2004 ມີໂທລະສັບຕັ້ງໂຕະ ແລະ ມືຖື ທັງໝົດ 441.113 ເລກໝາຍ, ເທົ່າກັບ 7,74% ຂອງຜູ້ຊົມໃຊ້, ເພີ່ມສູນກາງໂທລະສັບອັດຕະໂນມັດຂຶ້ນ 23 ແຫ່ງ, ເພີ່ມສູນກາງໂທລະສັບມືຖືຂຶ້ນຈາກ 1 ແຫ່ງໃນປີ 2001 ເປັນ 4 ແຫ່ງໃນປີ 2005. ຮອດປັດຈຸບັນ ຕາໜ່າງໂທລະຄົມມະນາຄົມກວມເອົາ 80 ກວ່າຕົວເມືອງໃນທົ່ວປະເທດ, ມີຫ້ອງການໄປສະນີທັງໝົດ 119 ແຫ່ງ, ຈ່າມໄປສະນີ 108 ແຫ່ງ, ຕາໜ່າງໄປສະນີຂັ້ນເມືອງມີ 117 ແຫ່ງ, ຂະຫຍາຍສາຍກາບໄຍແກ້ວທົ່ວປະເທດໄດ້ທັງໝົດ 11.500 ກິໂລແມັດ, ສູນກາງໂທລະ ສັບລວມທັງໝົດມີ 99 ແຫ່ງ, ມີໂທລະສັບມືຖື ແລະ ຕັ້ງໂຕະ 4.219.455 ກວ່າເລກໝາຍ ແລະ ນັບແຕ່ປີ 2012 ເປັນຕົ້ນມາໄດ້ນຳໃຊ້ມືຖືລະບົບ 4-G.

          ລະບົບນ້ຳປະປາກໍໄດ້ຂະຫຍາຍຕົວຈາກນະຄອນຫຼວງວຽງຈັນ ລົງສູ່ບັນດາແຂວງ ແລະ ເມືອງໃນທົ່ວປະເທດ, ປີ 2005 ມີບໍລິມາດນ້ຳປະປາ 75.000 3. ປີ 2012 ບໍລິມາດການຜະລິດນ້ຳປະປາເພີ່ມຂຶ້ນ ເປັນ 147,947,2203, ເທດສະບານທຸກແຂວງໄດ້ຊົມໃຊ້ຢ່າງທົ່ວເຖິງ, ສາມາດຕອບສະໜອງໃຫ້ປະຊາ ກອນໄດ້ຊົມໃຊ້ 1,862,876 ຄົນ, ບໍລິມາດສະໜອງໃຫ້ຜູ້ຊົມໃຊ້ທັງໝົດ 107,969,797 3ແລະ ປີ 2014 ບໍລິມາດການຜະລິດນ້ຳປະປາ ໃນນະຄອນຫຼວງວຽງຈັນມີ 126.268.196 3, ບັນດາແຂວງຜະລິດໄດ້ 55.428.000 3 .

          ຄຽງຄູ່ກັບການພັດທະນາດ້ານເສດຖະກິດ, ຂົງເຂດວັດທະນະທຳ-ສັງຄົມ ກໍໄດ້ຮັບການພັດທະນາດີຂຶ້ນຢ່າງຕໍ່ເນື່ອງເຊິ່ງສະແດງອອກດັ່ງນີ້:

ດ້ານການສຶກສາ: ນັບແຕ່ປະເທດຊາດໄດ້ຮັບການປົດປ່ອຍໃນປີ 1975 ເປັນຕົ້ນມາ, ພັກ ແລະ ລັດຖະບານໄດ້ຖືວຽກງານການສຶກສາເປັນວຽກທີ່ສຳຄັນ, ນຳເອົາການສຶກສາໄປກ່ອນກ້າວໜຶ່ງ, ຍ້ອນແນວນັ້ນ ການສຶກສາຈຶ່ງໄດ້ຮັບການພັດທະນາເປັນກ້າວໆນັບທັງດ້ານປະລິມານ ແລະ ຄຸນນະພາບ. ຈຸດເລີ່ມຂອງການສຶກສາປີ 1975 ຢູ່ ສປປ ລາວ ມີຄົນກືກໜັງສືປະມານ 90% ຂອງພົນລະເມືອງ.

ປະຈຸບັນອັດຕາເຂົ້າຮຽນຂອງເດັກອາຍຸ 5 ປີ ກຽມເຂົ້າໂຮງຮຽນປະຖົມມີ 55%; ອັດຕາເຂົ້າຮຽນສຸດທິຊັ້ນປະຖົມ ປະມານ 98% ທົ່ວປະເທດມີໂຮງຮຽນປະຖົມກວມເຖິງ 94%; ອັດຕາການເຂົ້າຮຽນຊັ້ນມັດທະຍົມກວມ 69%; ອັດຕາການຮູ້ໜັງສືໃນກຸ່ມອາຍຸ15-24 ປີ ບັນລຸໄດ້ປະມານ 99%.

ປະຖົມສຶກສາ: ໃນປີ 1975 - 1976 ມີ 4.444 ແຫ່ງ, ຮອດສົກຮຽນປີ 2013 - 2014 ມີ 8.927 ແຫ່ງ, ພາກເອກະຊົນ 196 ແຫ່ງ ມີນັກຮຽນທັງໝົດ 878.283 ຄົນ.

ມັດທະຍົມສຶກສາ: ໃນປີ 1975 - 1976 ມີ 83 ແຫ່ງສົກຮຽນປີ 2009 - 2010 ໄດ້ ເພີ່ມຂັ້ນຮຽນຂຶ້ນຕື່ມຄື ( ມ. 7 ), ປັດຈຸບັນທົ່ວປະເທດ ມີມັດທະຍົມຕອນຕົ້ນ ແລະ ຕອນປາຍ ທັງໝົດ 1.494 ແຫ່ງມີ-ນັກຮຽນ-ທັງ-ໝົດ 543.289  ຄົນ.

ການສຶກສານອກລະບົບ: ໃນສົກປີ 2013 - 2014 ມີ 140 ຕົວເມືອງ, ມີໂຮງຮຽນບຳລຸງມັດທະຍົມ ຕົ້ນ ແລະ ປາຍ 13 ແຫ່ງ, ມີນັກຮຽນທັງໝົດ 3.000 ກວ່າຄົນ, ສູນສຶກສາຊຸມຊົນ 310 ແຫ່ງ, ສູນຝຶກວິຊາຊີບ 28 ແຫ່ງ.

ອະຊີວະສຶກສາ ແລະ ສູນອົບຮົມວິຊາຊີບ: ມີໂຮງຮຽນວິຊາຊີບເພີ່ມຂຶ້ນ 95 ແຫ່ງ ໃນນັ້ນພາກ ເອກະຊົນ ມີ 73 ແຫ່ງ ມີ 4 ລະບົບຄື: ຊັ້ນຕົ້ນ, ຊັ້ນກາງ, ຊັ້ນສູງ ແລະ ເຊື່ອມຕໍ່ປະລິນຍາຕີ.

 ການສຶກສາຊັ້ນສູງ ແລະ ມະຫາວິທະຍາໄລ: ສົກປີ 2013 - 2014 ທົ່ວປະເທດ ມີມະຫາວິທະຍາ ໄລທັງໝົດ 5 ແຫ່ງ, ໃນນັ້ນ 4 ແຫ່ງຂຶ້ນກັບກະຊວງສຶກສາທິການ, 1 ແຫ່ງຂຶ້ນກັບກະຊວງສາທາລະນະສຸກ; ໂຮງຮຽນ ວິທະຍາໄລ ມີ 133 ແຫ່ງ, ພາກເອກະຊົນ 73 ແຫ່ງ, ທົ່ວປະເທດມີນັກສຶກສາຊັ້ນສູງ - ປະລິນຍາຕີ 115.523 ຄົນ, ປະລິນຍາໂທ 1.048 ຄົນ, ປະລິນຍາເອກ 34 ຄົນ. ນອກນັ້ນ, ຍັງມີນັກສຶກສາໄປຮຽນຕໍ່ຢູ່ ຕ່າງປະເທດ ທັງໝົດ 2.894 ຄົນ, ຍິງ 1.020 ຄົນ. ໃນປີ 1975 ມີໂຮງຮຽນສ້າງຄູ 1 ແຫ່ງ, ມີນັກສຶກສາ 170 ຄົນ, ຮອດປັດຈຸບັນ ມີໂຮງຮຽນສ້າງຄູທັງໝົດ 11 ແຫ່ງ ນັບທັງຄະນະສຶກສາສາດ ຂອງມະຫາວິທະຍາ ໄລແຫ່ງຊາດ.

ດ້ານກິລາ ກາຍະກຳ, ມີການຂະຫຍາຍຕົວຢ່າງກວ້າງຂວາງນັບແຕ່ສູນກາງເຖິງທ້ອງຖິ່ນ ແລະ ມີປວງຊົນເຂົ້າຮ່ວມໃນວຽກງານດັ່ງກ່າວນັບມື້ຫລາຍຂຶ້ນ ປະກອບສ່ວນເຮັດໃຫ້ບົດບາດຂອງ ສປປ ລາວ ສູງຂຶ້ນໃນເວທີພາກພື້ນ ແລະ ສາກົນ. ປັດຈຸບັນໃນທົ່ວປະເທດພວກເຮົາມີສະໜາມກິລາທີ່ໄດ້ມາດຕະ ຖານລະດັບຊາດ 4 ແຫ່ງ, ມາດຕະຖານລະດັບແຂວງ 10 ແຫ່ງ; ມີສະຫະພັນກິລາແຫ່ງຊາດທັງໝົດ 37 ສະຫະພັນ ແລະ 1 ສະມາຄົມກິລາຄົນພິການ. ພວກເຮົາມີຜົນສຳເລັດຫຼາຍປະການໃນວຽກງານກິລາ ກາຍະກຳອັນພົ້ນເດັ່ນແມ່ນການປັບປຸງກໍ່ສ້າງ ສະໜາມກິລາ, ປັບປຸງສູນຝຶກ ແລະ ໂຮງຮຽນກິລາ ກາຍະກຳ, ການອອກແບບສະໜາມກິລາຕາມມາດຕະຖານ, ການຝຶກແບບ ສ້າງນັກກິລາ, ການແຂ່ງຂັນກິລາປະເພດຕ່າງໆນັບທັງພາຍໃນ ແລະ ຕ່າງປະເທດ. ພິເສດ ສປປ ລາວ ໄດ້ຮັບກຽດເປັນເຈົ້າພາບຈັດງານແຂ່ງຂັນກິ ລາຊີເກມຄັ້ງທີ 25 ປີ 2009, ງານແຂ່ງຂັນກິລາມະຫາວິທະຍາໄລອາຊຽນຄັ້ງທີ 16 ແລະ ງານແຂ່ງຂັນ ອື່ນໆ ແລະ ໄດ້ເຂົ້າຮ່ວມງານແຂ່ງຂັນກິລາໃນລະດັບປະເທດ, ລະດັບພາກພື້ນ ແລະ ສາກົນນັບມື້ຫລາຍຂຶ້ນ.

          ດ້ານສາທາລະນະສຸກ: ຕະຫລອດໄລຍະ 40 ປີ ຜ່ານມາ, ການພັດທະນາສາທາລະນະສຸກ ໄດ້ຮັບການປັບປຸງດີຂຶ້ນ. ພັກ ແລະ ລັດຖະບານໄດ້ເອົາໃຈໃສ່ຫັນເອົາວຽກງານສາທາລະນະສຸກໄປສູ່ຮາກຖານປະ ຊາຊົນ, ຖືເອົາການກັນພະຍາດສົ່ງເສີມສຸຂະພາບເປັນຕົ້ນຕໍ ແລະ ຖືເອົາການປິ່ນປົວທີ່ມີຄຸນນະພາບ ແລະ ສະໜອງການ ບໍລິການດ້ານ ສາທາລະນະສຸກຢ່າງທົ່ວເຖິງເປັນສຳຄັນ, ປະຕິບັດລະບອບ ປິ່ນປົວບໍ່ເສຍຄ່າຕໍ່ເປົ້າໝາຍທີ່ທຸກຍາກຂາດເຂີນ ແລະ ດ້ອຍໂອກາດ. ຕາໜ່າງສາທາລະນະສຸກ ໄດ້ຂະຫຍາຍຕົວໄປເຖິງກຸ່ມບ້ານ. ປັດຈຸບັນປະຊາຊົນສາມາດເຂົ້າເຖິງການ ບໍລິການດ້ານສາທາລະນະສຸກໃນຂອບເຂດທົ່ວປະເທດກວມ 98%, ຊົມໃຊ້ນ້ຳສະອາດ ແລະ ວິດຖ່າຍນັບມື້ຫລາຍຂຶ້ນ; ຈຳນວນໂຮງໝໍນັບແຕ່ສູນກາງລົງຮອດທ້ອງຖິ່ນ, ຈຳນວນສຸກສາລາ, ຖົງຢາປະຈຳບ້ານ ແລະ ຈຳນວນແພດໝໍ ກໍເພີ່ມຂຶ້ນ. ອາຍຸຍືນສະເລ່ຍຂອງພົນລະເມືອງລາວ-ແມ່ນ 64 ປີ ( ຄາດວ່າຈະໄດ້ 68,3 ປີ ໃນ-ປີ 2015 ).

          ດ້ານແຮງງານການພັດທະນາສີມື ແຮງງານ ໄດ້ມີການປັບປຸງດີຂຶ້ນຢ່າງຕໍ່ເນື່ອງ, ທົ່ວປະເທດມີສູນພັດທະນາ ສີມືແຮງງານ ແລະ ສູນວິຊາຊີບທັງໝົດ 153 ກວ່າແຫ່ງ ເຊິ່ງສາມາດຝຶກວິຊາຊີບໄດ້ຫຼາຍໝື່ນ ຄົນ, ຈັດຫາວຽກເຮັດງານທຳໃຫ້ແຮງງານລາວໄດ້ເປັນຈຳນວນຫຼາຍ.

ໃນສົກປີ 2013 ມີຈຳນວນແຮງງານເຮັດວຽກຢູ່ຂະແໜງການຕ່າງຈຳນວນ 3,6 ລ້ານຄົນ, ໃນນັ້ນຢູ່ຂະແໜງກະສິກຳ 66,18%, ອຸດສາຫະກຳ 11,36% ແລະ ບໍລິການ 22,46%. ການຈັດຫາງານໂດຍຜ່ານບໍລິສັດຈັດຫາງານພາຍໃນປະເທດ ໃນສົກປີ 2013 - 2014 ມີທັງໝົດ 56.186 ຄົນ ເພີ່ມຂຶ້ນ 28,39% ຈາກສົກປີ 2012 - 2013. ຈັດຫາງານໃຫ້ແກ່ແຮງງານພາຍໃນມີທັງໝົດ 47.882 ຄົນ ເພີ່ມຂຶ້ນ 126,57%, ໃນນັ້ນ ຂະແໜງກະສິກຳມີທັງໝົດ 20.449 ຄົນ ເພີ່ມຂຶ້ນ 95,52%, ອຸດສາຫະກຳ 16.329 ຄົນ ເພີ່ມຂຶ້ນ 154,62%, ບໍລິການ 11,104 ຄົນ ເພີ່ມຂຶ້ນ 160,6%. ການຈັດຫາແຮງງານລາວອອກໄປເຮັດວຽກຢູ່ຕ່າງປະເທດເປັນທາງການ ໃນປີ 2014 ມີທັງໝົດ 8.304 ຄົນ ທຽບໃສ່ປີ  2013  ຫຼຸດລົງ  63,15% .

          ໃນສົກປີ 2013- 2014 ນຳເຂົ້າແຮງງານຢ່າງເປັນທາງການມີທັງໝົດ 49.915 ຄົນ ເພີ່ມຂຶ້ນ 9,2% ໃນນັ້ນ ແຮງງານເຂົ້າມາເຮັດວຽກຢູ່ຂະແໜງກະສິກຳ ກວມ 33,33% ເພີ່ມຂຶ້ນ 4,44%, ອຸດສາ ຫະກຳ 26,95% ເພີ່ມຂຶ້ນ 4,64% ແລະ ບໍລິການ 39,72% ເພີ່ມຂຶ້ນ 17,16%. ແຮງງານນຳເຂົ້າຕົ້ນຕໍແມ່ນຈາກ ສປ ຈີນ 32,64%, ຈາກ ສສ ຫວຽດນາມ 28,23%, ຈາກໄທ 24,97% ແລະ ປະເທດອື່ນໆ 14,16%.

          ການພັດທະນາຊົນນະບົດ ແລະ ການແກ້ໄຂຄວາມທຸກຍາກ, ພັກເຮົາຖືເອົາວຽກງານພັດທະນາຊົນ ນະບົດ ແລະ ແກ້ໄຂຄວາມທຸກຍາກຂອງປະຊາຊົນຕິດພັນກັບການເຮັດທົດລອງວຽກງານ 3 ສ້າງ ( ສ້າງ-ແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ) ໂດຍມີການເຮັດທົດລອງຕົວຈິງຢູ່ 51 ເມືອງ ແລະ 109 ບ້ານເປົ້າໝາຍ. ປີ 2014 ຢູ່ ສປປ ລາວ ມີເມືອງທັງໝົດ 148 ເມືອງ, ມີ 973 ກຸ່ມບ້ານ ແລະ 8.514 ບ້ານ. ມີພະນັກງານລົງກໍ່ສ້າງພື້ນຖານການເມືອງປະຈຳຢູ່ບ້ານ ແລະ ກຸ່ມບ້ານຈຳນວນ 6.424 ຄົນ, ໃນນັ້ນພະນັກງານຂັ້ນສູນກາງ307 ຄົນ, ຂັ້ນແຂວງ 579 ຄົນ, ເມືອງ 5.438 ຄົນ ແລະ ນັກສຶກສາຈຳນວນໜຶ່ງ ຜ່ານການຈັດຕັ້ງປະຕິບັດເຮັດໃຫ້ລະບົບການເມືອງຢູ່ຂັ້ນບ້ານ ແລະ ກຸ່ມບ້ານໄດ້ຮັບການປັບປຸງເຂັ້ມແຂງເທື່ອລະກ້າວ, ຈຳນວນບ້ານທີ່ມີລະບົບການຈັດຕັ້ງໜັກແໜ້ນ ມີໜ່ວຍພັກແຂງຮູ້ນຳພາຮອບດ້ານເພີ່ມຂຶ້ນ ກວມ 68% ຂອງຈຳ ນວນບ້ານໃນທົ່ວປະເທດ, ປະຊາຊົນບັນດາເຜົ່າປະກອບສ່ວນເຂົ້າໃນຂະບວນ ພັດທະນາເຖິງ 90.6% ອັດຕາສ່ວນຂອງຄວາມທຸກຍາກໄດ້ຫລຸດລົງຢ່າງຕໍ່ເນື່ອງ ເຊັ່ນ: ໃນປີ 2014 ມີບ້ານ ພັດທະນາຈຳນວນ 3.095 ບ້ານ ໃນຈຳນວນ 8.514 ບ້ານໃນທົ່ວປະເທດ, ກວມ 36,35%, ມີຄອບຄົວພັດທະນາ 808.422 ຄອບຄົວ, ກວມ 71,02%, ຍັງມີບ້ານທຸກຍາກ 1.966 ບ້ານ, ກວມ 23,09%, ຄອບຄົວທຸກຍາກມີ 92,328 ຄອບຄົວ, ກວມ 8,11% ໃນຈຳນວນ 1.138.287 ຄອບຄົວໃນທົ່ວປະເທດ, ທຽບໃສ່ປີ 2013 ຫຼຸດລົງ 24.480 ຄອບຄົວ; ເມືອງທຸກຍາກ 30 ເມືອງກວມ 20,27% ຂອງຈຳນວນ 148 ເມືອງທັງໝົດໃນທົ່ວປະເທດ.

ດ້ານຖະແຫຼງຂ່າວ-ວັດທະນະທຳ ແລະ ທ່ອງທ່ຽວ. ດ້ານຖະແຫຼງຂ່າວສື່ມວນຊົນເປັນເຄື່ອງມືອັນແຫຼມຄົມຂອງພັກ ແລະ ລັດ, ເປັນເວທີຂອງມະຫາຊົນ, ເປັນສາຍໄຍຜູກພັນມະຫາຊົນກັບພັກ. ຍ້ອນວ່າວຽກງານຖະແຫຼງຂ່າວເປັນວຽກໜຶ່ງທີ່ສຳຄັນ. ສະນັ້ນ, ພັກ ແລະ ລັດຖະບານ ຈຶ່ງໄດ້ເອົາໃຈໃສ່ຊີ້ນຳ ນຳພາ ເປັນແຕ່ລະໄລຍະຢ່າງເປັນປົກກະຕິ, ເຮັດໃຫ້ວຽກງານດັ່ງກ່າວຂະຫຍາຍຕົວທັງດ້ານຈຳນວນ ແລະ ຄຸນນະ ພາບ ເຊິ່ງສະແດງອອກໃນຜົນສຳເລັດຂອງແຕ່ລະຂະແໜງວຽກດັ່ງນີ້:

          ສື່ສິ່ງພິມໃນປີ 1975 ມີສືສິ່ງພິມທັງໝົດ ພຽງແຕ່ 5 ສະບັບ,  ຮອດ-ປີ 2015 ມີທັງໝົດ 127 ສະບັບ, ໃນນັ້ນ ໜັງສືພິມ 27 ສະບັບ; ວາລະສານ 96 ສະບັບ ແລະ ໃບຂ່າວ 4 ສະບັບ.

ດ້ານເນື້ອໃນຂອງສື່ສິ່ງພິມ ກໍຮັບການປັບປຸງໃຫ້ດີຂຶ້ນເປັນຕົ້ນແມ່ນ ບົດຄວາມ, ບົດເລື່ອງ, ບົດຂ່າວຕ່າງໆກໍມີລັກສະນະຕົວຈິງ ແລະ ທັນກັບສະພາບການ, ທັງມີຄຸນປະໂຫຍດໃນການສຶກສາອົບຮົມ, ແນະນຳທາງດ້ານຫາງສຽງກະແສແນວຄິດ ມີລັກສະນະແຫຼມຄົມ, ທັງເດັດດ່ຽວຕໍ່ສູ້ຕ້ານການບິດເບືອນ, ໃສ່ຮ້າຍປ້າຍສີຂອງພວກຄົນບໍ່ດີ ທັງພາຍໃນ ແລະ ຕ່າງປະເທດ.

ສື່ເອເລັກໂຕນິກວິທະຍຸ ໂທລະພາບໄດ້ຮັບການພັດທະນາໄວ ພໍສົມຄວນ ທັງດ້ານຈຳນວນ ແລະ ຄຸນນະພາບ ຮັບໃຊ້ໜ້າທີ່ການເມືອງດ້ວຍຜົນສຳເລັດເປັນກ້າວໆ ສະແດງອອກດັ່ງນີ້:

ວິທະຍຸກະຈາຍສຽງ ປີ 1975 ມີ ສະຖານີວິທະຍຸກະຈາຍສຽງ 8 ສະຖານີ. ປັດຈຸບັນທົ່ວປະ ເທດ ມີສະຖານີວິທະຍຸທັງໝົດ 64 ສະຖານີ ຊຶ່ງແຜ່ກະແສຄື້ນ ກວມ 90% ຂອງພື້ນທີ່ທົ່ວປະເທດ.

          ໂທລະພາບ ສະຖານີໂທລະພາບແຫ່ງຊາດລາວ ໄດ້ຮັບການສ້າງຕັ້ງຂຶ້ນ ວັນທີ 1 ທັນວາ 1983. ປັດຈຸບັນທົ່ວປະເທດມີສະຖານີໂທລະພາບທັງໝົດ 37 ສະຖານີ, ແຜ່ກະແສຄື້ນກວມ 75% ຂອງພື້ນທີ່ທົ່ວປະເທດ.

   ວຽກງານວັດທະນະທຳ: 40 ປີ ຜ່ານມາ ພັກ ແລະ ລັດຖະບານ ໄດ້ເອົາໃຈໃສ່ຊີ້ນຳ-ນຳພາວຽກງານ ວັດ ທະນະທຳຢ່າງຮອບດ້ານ ພັກ-ໄດ້-ມີ-ທັດສະນະ-ວ່າ: " ວັດທະນະທຳ ເປັນພື້ນຖານແຫ່ງຄວາມຍືນຍົງຄົງຕົວ-ຂອງ-ຊາດ, ເປັນກຳລັງດັນໃຫ້ສັງຄົມຂະຫຍາຍຕົວ ແລະ ເປັນຈຸດໝາຍຂອງ ການພັດທະນາສັງຄົມ " ຈາກ-ທັດສະນະ-ດັ່ງກ່າວ, ເລີ່ມແຕ່ໄລຍະຕົ້ນຂອງການປະຕິວັດປົກປັກຮັກສາ ແລະ ພັດທະນາປະເທດຊາດ, ພັກ ໄດ້ນຳພາປວງຊົນລາວທັງຊາດຟື້ນຟູ ແລະ ກໍ່ສ້າງວັດທະນະທຳແຫ່ງຊາດ, ຕີຖອຍ ແລະ ລຶບ ລ້າງຮ່ອງຮອຍວັດທະນະທຳ ທີ່ເສື່ອມຊາມຊອດກະຈາຂອງລະບອບລ່າເມືອງຂຶ້ນ, ປຸກລະດົມຊຸກຍູ້ ແລະ ສົ່ງເສີມຂະບວນວັດທະນະທຳ, ສິລະປະວັນນະກຳ ທີ່ມີລັກສະນະຊາດ,ກ້າວໜ້າ ແລະ ລັກສະນະມະຫາ ຊົນໃຫ້ກາຍເປັນພື້ນຖານວັດທະນະທຳຂອງລະບອບໃໝ່.

   ປັດຈຸບັນ ສ ປ ປ ລາວ ມີແຫຼ່ງມໍລະດົກທົ່ວປະເທດ 191 ແຫ່ງ, ໃນນັ້ນ ມີແຫຼ່ງມໍລະດົກໂລກ 2 ແຫ່ງ ຄື: ເມືອງຫລວງພະບາງ ( ມໍລະດົກ-ໂລກ-ທາງ-ວັດທະນະທຳ ) ວັດພູຈຳປາສັກ ( ມໍລະດົກໂລກທາງສະຖາປັດຕະຍະກຳ ), ພ້ອມນີ້ ກໍຍັງສືບຕໍ່ສຳຫຼວດຂໍ້ມູນປະກອບເອກະສານ ເພື່ອນຳສະເໜີອົງການຢູ່ເນັດສະໂກ ຮັບຮອງເອົາທົ່ງໄຫຫີນ ແຂວງ ຊຽງຂວາງ ເປັນມໍລະດົກໂລກແຫ່ງທີ 3 ແລະ ເກັບກຳຂໍ້ມູນພູຫີນໜາມໜໍ່ແຂວງ ຄຳມ່ວນ ເພື່ອສະເໜີເປັນ ມໍລະດົກໂລກທາງທຳມະຊາດແຫ່ງທຳອິດຂອງ ສ ປ ປ ລາວ;ມໍລະດົກແຫ່ງຊາດ 15 ແຫ່ງ ແລະ ທ້ອງຖິ່ນ 174 ແຫ່ງ. ມີ ຫໍພິພິທະພັນທັງໝົດ 24 ແຫ່ງ, ໃນນັ້ນ ຫໍ ພິພິຕະພັນແຫ່ງຊາດ 8 ແຫ່ງ ແລະ ທ້ອງຖິ່ນ 15 ແຫ່ງ. ທົ່ວປະເທດມີ ຄອບຄົວວັດທະນະທຳທັງໝົດ 682,803 ຄອບຄົວ, ເທົ່າກັບ 52,74%; ມີ ບ້ານວັດທະນະທຳ 4,015 ບ້ານ, ເທົ່າກັບ 41,09% ຂອງບ້ານ ທັງໝົດໃນທົ່ວປະເທດ; ກຸ່ມບ້ານວັດທະນະທຳມີ 87 ກຸ່ມບ້ານ, ເທົ່າກັບ 7,53% ຂອງກຸ່ມບ້ານທັງໝົດໃນທົ່ວປະເທດ.

   ວຽກງານທ່ອງທ່ຽວ: ການທ່ອງທ່ຽວ ເປັນທ່າແຮງອັນສຳຄັນ ໃນການສ້າງລາຍຮັບເຂົ້າງົບປະມານ. ລັດຖະບານໄດ້ ກຳນົດການພັດທະນາການທ່ອງທ່ຽວເຂົ້າໃນ 8 ແຜນງານບູລິມະສິດ ເພື່ອພັດທະນາເສດ ຖະກິດສັງຄົມ ໃຫ້ມີບາດກ້າວຂະຫຍາຍຕົວຂຶ້ນ. ນັບແຕ່ປີ 1989 ເປັນຕົ້ນມາ ພັກ ແລະ ລັດໄດ້ສົ່ງເສີມ ການທ່ອງທ່ຽວ, ສະຖານທີ່ທ່ອງທ່ຽວແຫ່ງຕ່າງໆ ໄດ້ຮັບການພັດທະນາສາມາດດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວສະຖານທີ່ຕ່າງໆນັບມື້ນັບຫຼາຍຂຶ້ນ. ປີ 2012 ປະເທດເຮົາໄດ້ເປີດປີທ່ອງທ່ຽວລາວ ແລະ ເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ແລະ ງານວາງສະແດງການທ່ອງທ່ຽວອາຊຽນ ປີ 2013 ແລະ ອື່ນໆ. ດ້ວຍຜົນສຳເລັດຫຼາຍດ້ານໂດຍສະເພາະດ້ານການບໍລິການ, ການອະນຸລັກ, ການຮັກສາສະພາບສິ່ງແວດລ້ອມທາງດ້ານວັດທະນະທຳ ແລະ ທຳມະຊາດ, ເຮັດໃຫ້ ສ ປ ປ ລາວ ໄດ້ຮັບລາງວັນດີເດັ່ນ " ເປັນປະເທດທີ່ໜ້າທ່ອງທ່ຽວທີ່ສຸດໃນໂລກ ສຳລັບປີ 2013"  ຈາກສະພາການທ່ອງທ່ຽວ ແລະ ການຄ້າເອີຣົບ.

   ວຽກງານຍຸຕິທຳ: ຮອດປີ 2015 ພວກເຮົາມີ ກົດໝາຍທີ່ປະກາດໃຊ້ຫຼາຍກວ່າ 100 ສະບັບ, ລັດຖະບັນຍັດມີຫຼາຍກວ່າ 20 ສະບັບ, ດຳລັດ ມີຫຼາຍກວ່າ 143 ສະບັບ ແລະ ນິຕິກຳອື່ນໆຫຼາຍກວ່າ 189 ສະ ບັບ.

    ດ້ານການພົວພັນຮ່ວມມືກັບຕ່າງປະເທດ: ສປປ ລາວ ໄດ້ ເປີດກວ້າງການພົວພັນກັບ ຕ່າງປະເທດ ແລະ ຮ່ວມມືສາກົນ ໂດຍຢືດໝັ້ນແນວທາງການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມ ມືຢ່າງສະເໝີຕົ້ນສະເໝີປາຍ; ສົ່ງເສີມການພົວພັນຮ່ວມມືກັບ ຕ່າງປະເທດແບບຫຼາຍທິດ, ຫຼາຍຝ່າຍ, ຫຼາຍລະດັບ ແລະ ຫຼາຍຮູບແບບ ບົນພື້ນຖານຫຼັກການເຄົາລົບຊຶ່ງກັນ ແລະ ກັນ, ຕ່າງຝ່າຍຕ່າງມີ ຜົນປະໂຫຍດ.

ການພົວພັນຮ່ວມມື ກັບບັນດາປະເທດເພື່ອນມິດຍຸດທະສາດ, ໂດຍສະເພາະກັບ ສ.ສ ຫວຽດນາມ ແລະ ສ.ປ ຈີນ ນັບມື້ນັບກ້າວເຂົ້າສູ່ລວງເລິກ; ການເຄື່ອນໄຫວພົວພັນຢ່າງຕັ້ງໜ້າໃນຂອບການຮ່ວມມື ຂອງອະ ນຸພາກພື້ນ, ພາກພື້ນ ແລະ ສາກົນ, ໃນປີ 1995 ສ ປ ປ ລາວ ໄດ້ຖືກເລືອກຕັ້ງໃຫ້ເປັນ ຮອງປະທານກອງ ປະຊຸມສະມັດຊາໃຫຍ່. ອົງການສະຫະປະຊາຊາດ ( ສປຊ ) ຊຶ່ງ ເປັນກຽດອັນສູງສົ່ງສຳລັບ ສ ປ ປ ລາວ ເພາະມັນເປັນ ປີສະເຫລີມສະຫລອງ ສປຊ ຄົບຮອບ 50 ປີ ໃນທົ່ວໂລກ; ວັນທີ 23/7/1997 ສ ປ ປ ລາວ ໄດ້ເຂົ້າເປັນສະມາຊິກສົມບູນ ຂອງສະມາຄົມບັນດາປະຊາຊາດອາຊີຕາເວັນອອກສ່ຽງໃຕ້ ( ອາຊຽນASEAN ); ສ ປ ປ ລາວ ເປັນສະມາຊິກຂອງຂະບວນການບໍ່ຮ່ວມກຸ່ມ, ຂອງອົງການບັນດາປະເທດທີ່ໃຊ້-ພາສາຝຣັ່ງ, ສະມາຊິກ ຂອງກອງທຶນການເງິນລະຫວ່າງປະເທດ ( IMF ), ສະມາຊິກ ຂອງທະນາຄານພັດ ທະນາແຫ່ງເອເຊຍ (ADB ), ເປັນສະມາຊິກແຫ່ງສົນທິສັນຍາ ກ່ຽວກັບບັນຫາຢາເສບຕິດ, ສິ່ງແວດລ້ອມ ແລະ ສົນທິສັນຍາສາກົນອື່ນໆ; ເຂົ້າຮ່ວມໃນລັດຖະສະພາສາກົນ ( IPO ); 26/10/2012 ສ ປ ປ ລາວ ໄດ້ ເຂົ້າເປັນສະມາຊິກອົງການການຄ້າໂລກ ( WTO ).

    ປີ 2015 ສ ປ ປ ລາວ ມີການພົວພັນການທູດກັບ 138 ປະເທດ, ມີ ສຳນັກງານຜູ້ຕາງໜ້າການທູດຂອງ ສ ປ ປ ລາວ ຢູ່ຕ່າງປະເທດ 38 ແຫ່ງ, ໃນນັ້ນມີ ສະຖານເອກອັກຄະລັດຖະທູດ 26 ແຫ່ງ, ສຳນັກ ງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 8 ແຫ່ງ, ຫ້ອງການກົງສູນ 1 ແຫ່ງ, ມີກົງສຸນກິດຕິມະສັກລາວ ຢູ່ຕ່າງປະເທດ 17 ປະເທດ, ກົງສຸນກິດຕິມະສັກຢູ່ລາວ 15 ປະເທດ, ມີດ່ານສາກົນ 27 ແຫ່ງ, ມີການພົວພັນກັບພັກການເມືອງ 124 ພັກ ແລະ ມີການພົວພັນດ້ານເສດຖະກິດກັບ 50 ກວ່າປະເທດ; ຍ້ອນມີການພົວພັນຮ່ວມມືດັ່ງກ່າວ ຈິ່ງ ເຮັດໃຫ້ ສປປ ລາວ ມີບົດບາດເພີ່ມຂຶ້ນໃນເວທີພາກພື້ນ -ແລະ- ສາກົນ-.

          ວຽກງານປ້ອງກັນຊາດ-ປ້ອງກັນຄວາມສະຫງົບ: ປະເທດເຮົາໄດ້ຮັບການຍ້ອງຍໍຊົມເຊີຍຈາກສາກົນວ່າເປັນປະເທດທີ່ມີສະຖຽນລະພາບທາງດ້ານການເມືອງໜັກແໜ້ນ,ສັງຄົມມີຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍ; ປະຊາຊົນມີນ້ຳໃຈເອື້ອເຟື້ອເພື່ອແຜ່ ແລະ ມີໄມຕີຈິດ, ເປັນປະ ເທດທີ່ມີຄວາມສະຫງົບ ແລະ ໜ້າທ່ອງທ່ຽວເຊັ່ນ: ປີ 2014 ມີບ້ານແບບຢ່າງດ້ານປ້ອງກັນຊາດດີ ເຖິງ 7.014 ບ້ານ, ໃນຈຳນວນ 8.514 ບ້ານໃນທົ່ວປະເທດ, ກວມ 82,38% ທຽບໃສ່ປີ 2013 ເພີ່ມຂຶ້ນ 72 ບ້ານ; ບ້ານປ້ອງກັນຄວາມສະຫງົບດີມີ 6.491 ບ້ານ, ກວມ 76,24%; ບ້ານປອດຄະດີ 5.883 ບ້ານ, ກວມ 69,10% ທຽບໃສ່ປີ 2013 ເພີ່ມຂຶ້ນ 698 ບ້ານ; ບ້ານປອດຄະດີຢາເສດຕິດມີ 5.637 ບ້ານ, ກວມ 66,21% ທຽບໃສປີ 2013 ເພີ່ມຂຶ້ນ 294 ບ້ານ.

          III. ສືບຕໍ່ເສີມຂະຫຍາຍມູນເຊື້ອ 2 ທັນວາເຂົ້າໃນການສ້າງສາພັດທະນາປະເທດຊາດ

          1./ ຕັ້ງໜ້າສຶກສາ-ອົບຮົມການເມືອງນຳພາແນວຄິດພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃຫ້ເຊີດຊູນ້ຳໃຈຮັກຊາດ ເອກະລາດເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນເອງ ເພື່ອສ້າງປະເທດຊາດ ໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ ສັງຄົມມີຄວາມສາມັກຄີປອງດອງ, ຍຸຕິທຳ ແລະ ສີວິໄລ.

          ຄະນະພັກ, ຄະນະໂຄສະນາອົບຮົມທຸກຂັ້ນ ຕ້ອງເພີ່ມຄວາມເອົາໃຈໃສ່ຕໍ່ວຽກງານການເມືອງ ແນວຄິດໃຫ້ມີຄຸນນະພາບສູງຂຶ້ນ ດ້ວຍການປັບປຸງເນື້ອໃນ ແລະ ວິທີການໃຫ້ເໝາະສົມ ແລະ ແທດເຖິງຕົວຈິງ, ບໍ່ເຮັດແບບລັກສະນະຮູບການ, ແຫ້ງກະແດ້ງ, ຂາດຄວາມມີຊີວິດຊີວາ. ຕ້ອງເອົາວຽກງານໂຄສະນາສຶກສາອົບຮົມ ຕິດພັນກັບວຽກງານພັດທະນາເສດຖະກິດ -ສັງຄົມ ແລະ ຕິດພັນກັບຂະບວນການຮັກຊາດ ແລະ ພັດທະນາ ແລະ ວຽກງານ 3 ສ້າງ ໃຫ້ປະກົດຜົນເປັນຈິງ. ຕ້ອງເພີ່ມງົບປະມານໃຫ້ແກ່ການເຄື່ອນໄຫວວຽກ ງານດັ່ງກ່າວ ໃຫ້ມີປະສິດທິຜົນ.

          2./ -ຕັ້ງໜ້າປຸກລະດົມຂະບວນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດ - ສັງຄົມ ຂອງລັດໃຫ້ປະກົດຜົນເປັນຈິງເພື່ອບັນລຸເປົ້າໝາຍສະຫັດສະວັດດ້ານການພັດທະນາ ເຮັດໃຫ້ປະເທດຊາດຫຼຸດພົ້ນອອກຈາກຄວາມດ້ອຍພັດທະນາໃນປີ 2020. ສິ່ງສຳຄັນຕ້ອງຮັບປະກັນໃຫ້ເສດຖະກິດ ມີການເຕີບໂຕຢ່າງຕໍ່ເນື່ອງ ແລະ ເສດຖະກິດມະຫາພາກມີຄວາມໝັ້ນທ່ຽງ.

          3./ ເພີ່ມທະວີຄວາມສັກສິດ ແຫ່ງການຄຸ້ມຄອງລັດຄຸ້ມຄອງສັງຄົມ ຕາມທິດພັກນຳພາ, ລັດຄຸ້ມ ຄອງດ້ວຍກົດໝາຍ ແລະ ປະຊາຊົນເປັນເຈົ້າເຂົ້າຮ່ວມ; ເຮັດໃຫ້ສັງຄົມມີຄວາມສະຫງົບ, ສາມັກຄີປອງ ດອງ  ແລະ ມີການພັດທະນາດ້ວຍຄວາມໜັກແໜ້ນຕໍ່ເນື່ອງ. 

          4./ -ເພີ່ມທະວີຄວາມສາມັກຄີປອງດອງຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກ, ເອົາໃຈໃສ່ຈຳກັດແກ້ໄຂປະກົດການຫຍໍ້ທໍ້ຕ່າງໆໃນສັງຄົມ, ສ້າງບັນຍາກາດສົດໃສ, ສະຫງ່າຜ່າເຜີຍ, ມີຄວາມຍິ້ມແຍ້ມແຈ່ມໃສ, ເຮັດໃຫ້ປະເທດຊາດມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.

          5./ ເອົາໃຈໃສ່ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ ໂດຍສະເພາະ ກັບບັນດາປະເທດເພື່ອນມິດຍຸດທະສາດ, ບັນດາ-ປະເທດໃກ້ຄຽງ ກໍຄືບັນດາປະເທດໃນປະຊາຄົມອາຊຽນ, ອົງການຈັດຕັ້ງສາກົນ ແລະ ປະເທດເພື່ອນມິດໃນໂລກ, ອັນນີ້ ແມ່ນປັດໄຈອັນຈຳເປັນ ແລະ ຂາດບໍ່ໄດ້ ເພື່ອສ້າງເປັນກຳລັງແຮງສັງລວມເຂົ້າໃນພາລະ ກິດປົກປັກຮັກສາ ແລະ ພັດທະນາສ້າງສາປະເທດຊາດ.

 

ກົດໝາຍແຫ່ງ ສປປ ລາວ

ຊົມເຊີມວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 60 ປີ

ຊົມເຊີມວັນສ້າງຕັ້ງ ສປປ ລາວ ຄົບຮອບ 40 ປີ ຢ່າງສຸດໃຈ.

ປະທານ ໄກສອນ ພົມວິຫານ ຢືນຢົງໃນພາລະກິດປະຕິວັດຂອງພວກເຮົາຕະຫລອດໄປ

ກອງປະຊຸມໃຫຍ່ຜູ້ແທນທົ່ວປະເທດ ຂອງ ພັກປະຊາຊົນ ປະຕິວັດລາວ

 

ວີດີໂອທັງໝົດ

ເຊື່ອມຕໍ່ເວບໄຊສ

ເລກໂທ ສຸກເສີນ

ແຈ້ງ​ໄຟ​ໄໝ້ : 1190

   ຕຳຫຼວດ : 1191

ລົດ​ໂຮງໝໍ : 1195

​     ໄຟຟ້າ : 1199

  ນ້ຳ​ປະປາ : 1169

ໜ່ວຍກູ້​ໄພ : 1624